- 255 సెంట్రింగ్ డబ్బాలు, రూ.99 వేల నగదు పట్టివేత
కౌడిపల్లి, వెలుగు: సెంట్రింగ్ డబ్బాలు చోరీ చేసిన 10 మంది యువకులను, వాటిని కొనుగోలు చేసిన వ్యాపారిని అరెస్ట్ చేసినట్టు ఎస్పీ బాలస్వామి తెలిపారు. శనివారం కౌడిపల్లి పీఎస్లో ఏర్పాటు చేసిన మీడియా సమావేశంలో ఆయన వివరాలు వెల్లడించారు. కొల్చారం, కౌడిపల్లి, శంకరంపేట మండలాల్లో 15 రోజుల నుంచి సెంట్రింగ్ డబ్బాలు చోరీ అవుతున్నాయని పీఎస్లో 5 కేసులు నమోదయ్యాయన్నారు.
విచారణ చేపట్టిన పోలీసులు సంగారెడ్డి జిల్లా హత్నూర మండలం పల్పనూరు వద్ద మహబూబ్ నగర్ జిల్లా మక్తల్ కు చెందిన నారాయనోళ్ల నింగప్ప కు చెందిన స్క్రాప్ దుకాణంలో 255 సెంట్రింగ్ డబ్బాలు గుర్తించారన్నారు. ఈ మేరకు అతడిని విచారించడంతో శివ్వంపేటకు చెందిన మక్కాని నవీన్, సంపంగి విజయ్, మక్కాని పవన్, వడ్డే శ్రీకాంత్, కొల్చారం మండలం రంగంపేటకు చెందిన ద్యారంగుల అనిల్, వడ్డే యాదయ్య, వడ్డే దుర్గ ప్రసాద్, శ్రీనివాస్, కౌడిపల్లి మండలం నాగ్సాన్పల్లికి చెందిన వాదిల దుర్గ ప్రసాద్, అల్లాదుర్గంకు చెందిన దండుగుల ప్రవీణ్ ముఠాగా ఏర్పడి సెంట్రింగ్ బాక్స్ లు దొంగతనం చేస్తున్నట్టు తేలిందన్నారు. ఈ దొంగల ముఠా 225 సెట్రింగ్ బాక్స్లు చోరీ చేయగా, వాటి విలువ రూ. 2.30 లక్షలు ఉంటుందని చెప్పారు. వాటితోపాటు రూ.99 వేల నగదు కూడా దొంగలించారని పేర్కొన్నారు.
