- కనెక్షన్ కోసం నెలలుగా రైతుల ఎదురుచూపులు
సిరికొండ, వెలుగు : ట్రాన్స్కో ఆఫీసర్ల నిర్లక్ష్యం రైతులకు శాపంగా మారింది. నిజామాబాద్ జిల్లా సిరికొండ మండలం కొండూర్గ్రామంలో గతేడాది కురిసిన భారీ వర్షాలకు పెద్దమ్మ ఫీడర్ స్తంభాలు నేలకూలాయి. దీంతో కొట్టాల ఫీడర్తో రైతుల పంట పొలాలకు తాత్కాలికంగా కరెంట్కనెక్షన్ఇచ్చి అధికారులు చేతులు దులుపుకున్నారు. ఇటీవల కురిసిన గాలి వానకు కొట్టాల ఫీడర్ స్తంభాలు సైతం విరిగిపడడంతో సమస్య తీవ్రమైంది. 8 నెలల కిందట పెద్దమ్మ ఫీడర్కు సంబంధించి స్తంభాలు వేసి, వైర్లు వేయకుండా అలాగే వదిలేశారు.
ప్రస్తుతం ఖరీఫ్పనులు స్టాట్కావడంతో సుమారు 350 మందికిపైగా రైతుల మోటర్లకు కరెంట్కనెక్షన్ లేకపోవడంతో తీవ్ర ఆందోళన చెందుతున్నారు. పలుమార్లు సమస్య తీర్చాలని అధికారులకు విన్నవించినా పట్టించుకోవడం లేదని వాపోతున్నారు. కొందరు రైతులు ట్రాక్టర్ల డైనమో ద్వారా బోరు మోటర్లకు కనెక్షన్ఇచ్చి నారుమడులు సిద్ధం చేసుకుంటున్నారు. ఇందుకోసం గంటకు రూ.200 నుంచి 300 వరకు ఖర్చు చేస్తున్నారు. ఇప్పటికైనా కలెక్టర్, జిల్లా స్థాయి ఆఫీసర్లు స్పందించి తమ సమస్య తీర్చాలని రైతులు కోరుతున్నారు.
