- పోటాపోటీగా క్యాంపులు
- హైదరాబాద్ నుంచి గోవా తరలిన వైస్ చైర్మన్ రమేశ్రెడ్డి గ్రూప్
- మద్దతిచ్చే డైరెక్టర్లతో భాస్కర్రెడ్డి సీక్రెట్ క్యాంప్
- నంబర్ గేమ్లో పై చేయికి ఎత్తులు
- ఈ నెల 21న నోకాన్ఫిడెన్స్ మీటింగ్కు అధికారుల ఏర్పాట్లు
నిజామాబాద్, వెలుగు: డీసీసీబీ చైర్మన్ పోచారం భాస్కర్రెడ్డికి వ్యతిరేకంగా కొనసాగుతున్న అవిశ్వాస రాజకీయాలు హీటెక్కాయి. ఆయన్ను గద్దెదింపేందుకు అవసరమైన డైరెక్టర్లతో వైస్ చైర్మన్ రమేశ్ రెడ్డి క్యాంప్లు మారుస్తుండగా, చైర్మన్ భాస్కర్రెడ్డి సైతం తన మద్దతు డైరెక్టర్లతో రహస్యంగా క్యాంప్ నిర్వహిస్తున్నారు. పదవి నుంచి దింపాలనే పంతంతో ఒక వర్గం, అవిశ్వాసం వీగిపోయేలా చేయాలని మరో వర్గం పట్టుదలతో ఉన్నారు. మరోపక్క ఈ నెల 21న నోకాన్ఫిడెన్స్ మీటింగ్ ఏర్పాటుకు ఆఫీసర్లు రెడీ అయ్యారు.
డైరెక్టర్లను లాక్కునేందుకు వేట..
గత బీఆర్ఎస్ గవర్నమెంట్లో స్పీకర్గా పనిచేసిన పోచారం శ్రీనివాస్రెడ్డి తన పలుకుబడితో కొడుకు భాస్కర్రెడ్డికి డీసీసీబీ చైర్మన్ పదవి ఇప్పించారు. భాస్కర్ రెడ్డి తీరుపై మెజార్టీ డైరెక్టర్లు మొదటి నుంచి గుస్సాగా ఉన్నారు. తనకు దక్కాల్సిన పదవిని ఎగరేసుకుపోయాడన్న కోపంతో ఉన్న వైస్ చైర్మన్ కుంట రమేశ్రెడ్డి సరైన టైం కోసం ఎదురుచూశారు.
రాష్ట్రంలో అధికారం మారడంతో పరిస్థితులు అనుగుణంగా ఉన్నాయని అంచనా వేసిన రమేశ్రెడ్డి, చైర్మన్పై అవిశ్వాసానికి అవసరమైన మద్దతు కూడగట్టారు. ఈనెల 5న 14 మంది డైరెక్టర్లు డీసీవో శ్రీనివాస్కు అవిశ్వాస లేఖ ఇచ్చారు. డైరెక్టర్లు వెంటనే క్యాంపునకు తరలించారు. ప్రత్యర్థులకు జాడ తెలవొద్దనే ఉద్దేశంతో గడిచిన వారం రోజుల పాటు హైదరాబాద్లో కొనసాగిన శిబిరాన్ని తాజాగా గోవాకు మార్చారు.
కుటుంబ సభ్యులతో తప్పా, బయటి వారికి ఫోన్లలో మాట్లాడకుండా జాగ్రత్తలు తీసుకుంటున్నారు. వైస్ చైర్మన్ క్యాంప్లోని ఒక్క డైరెక్టర్ను లాక్కున్నా అవిశ్వాసం వీగిపోయే ఛాన్స్ఉండడంతో చైర్మన్ భాస్కర్రెడ్డి తన ప్రయత్నాలు ముమ్మరం చేస్తున్నారు. ఓ వైపు తన మద్దతుదారులతో క్యాంప్ నిర్వహిస్తూనే, ప్రత్యర్థి క్యాంప్ సభ్యుల జాడను కనుక్కునేందుకు ప్రయత్నిస్తున్నారు.
2/3 ఓట్ల గేమ్
డీసీసీబీలో మొత్తం 25 మంది డైరెక్టర్లు ఉండగా వారిలో సింగిల్ విండోలకు ప్రాతినిధ్యం వహిస్తున్న 20 మందికి మాత్రమే ఓటు హక్కు ఉంది. నిబంధనల ప్రకారం ఓటు ఉన్న మొత్తం డైరెక్టర్లలో సగం కంటే ఎక్కువ అంటే 11 మంది కోరం అటెండ్ అయితేనే నోకాన్ఫిడెన్స్ మీటింగ్ నిర్వహిస్తారు. లేకుంటే అవిశ్వాసం వీగిపోతుంది. అయితే అవిశ్వాసానికి మద్దతుగా 2/3 మెజార్టీ అంటే 14 మంది ఓటేస్తేనే అవిశ్వాసం నెగ్గుతుంది. నోకాన్ఫిడెన్స్ లెటర్పై సంతకాలు చేసిన 14 మంది డైరెక్టర్లు క్యాంపులో ఉన్నారు.
వైస్ చైర్మన్ శిబిరంలోని ఒక్క డైరెక్టర్ను తన వైపు లాక్కున్నా అవతలి వైపు బలం 13కు తగ్గి నోకాన్ఫిడెన్స్ వీగిపోతుంది. ఆ దిశగా భాస్కర్రెడ్డి ముమ్మర ప్రయత్నాలు చేస్తుండగా, అతడికి ఎవరూ చిక్కకుండా వైస్ చైర్మన్ రమేశ్రెడ్డి పావులు కదుపుతున్నారు. ఒకసారి ప్రతిపాదించిన అవిశ్వాసం వీగిపోతే మరో ఏడాది వరకు అవిశ్వాసం ప్రతిపాదించే అవకాశం ఉండదు. ప్రస్తుత పాలకవర్గ పదవీకాలం వచ్చే ఫిబ్రవరి దాకా ఉంది. కాబట్టి బయటపడాలనే వ్యూహంతో భాస్కర్రెడ్డి ఉన్నారు.
రెండువైపులా రాజీనామా చర్చ
మెజార్టీ డైరెక్టర్ల సంతకాలతో అవిశ్వాస తీర్మానానికి లెటర్ ఇచ్చాక పోచారం భాస్కర్రెడ్డి తన చైర్మన్ పదవికి రిజైన్ చేస్తారని వైస్ చైర్మన్ రమేశ్రెడ్డి మద్దతుదారులు భావించారు. బీఆర్ఎస్నుంచి జహీరాబాద్ ఎంపీ టికెట్వస్తే నోకాన్ఫిడెన్స్ మీటింగ్కు ముందే తన పదవికి రాజీనామా చేయాలని భాస్కర్రెడ్డి ప్లాన్వేశారు. పై రెండు జరగనందున ఉత్కంఠ కొనసాగుతోంది.
