వందే భారత్ ఎక్స్ప్రెస్పై మరో సారి రాళ్ల దాడి జరిగింది. ఒడిశాలో నవంబర్ 26న గుర్తు తెలియని దుండగులు రూర్కెలా-భువనేశ్వర్ (20835) రైలును లక్ష్యంగా చేసుకుని దాడికి పాల్పడ్డారు. అధికారులు తెలిపిన వివరాల ప్రకారం, రాష్ట్రంలోని దెంకనల్-అంగుల్ రైల్వే సెక్షన్లో మెరమండలి -బుధపాంక్ మధ్య ఈ సంఘటన జరిగింది. ఈ ఘటనలో ఎగ్జిక్యూటివ్ క్లాస్ కోచ్ కిటికీలు దెబ్బతిన్నాయని వారు తెలిపారు.
ఈ ఘటనపై విధి నిర్వహణలో ఉన్న ఆర్పీఎఫ్ ఎస్కార్టింగ్ సిబ్బంది ఫిర్యాదు చేశారు. సమాచారం అందుకున్న ఈస్ట్ కోస్ట్ రైల్వే జోన్ (ECoR) భద్రతా విభాగం రైల్వే ప్రొటెక్షన్ ఫోర్స్ (RPF), ప్రభుత్వ రైల్వే పోలీసు (GRP)ని అప్రమత్తం చేసింది. ఈ క్రమంలోనే కటక్ నుంచి ఆర్పీఎఫ్ అసిస్టెంట్ సెక్యూరిటీ కమిషనర్ ఘటనా స్థలానికి చేరుకున్నారు.
ఈ విషయం గురించి స్థానిక పోలీసులకు కూడా సమాచారం అందించామని, రాళ్ల దాడి చేసిన వారిపై కఠిన చర్యలు తీసుకుంటామని రైల్వే ఓ ప్రకటనలో తెలిపింది. స్థానిక పోలీసులతో సమన్వయంతో ECoR భద్రతా విభాగం రెండూ నిందితులను గుర్తించే పనిలో ఉన్నాయని చెప్పింది.
