ఫోన్, కారుని కంటిచూపుతో కంట్రోల్ చేసేలా కొత్త ఏఐ టెక్నాలజీ వచ్చింది. ఈ కొత్త టెక్నాలజీతో డ్రైవర్ లేకుండానే కారు నడపొచ్చు. ఫోన్ ఆన్ చేసి కంటిచూపుతో ఆపరేట్ చేయొచ్చు.
బార్సిలోనాలో మొబైల్ కాంగ్రెస్ ఈవెంట్లో టెక్ కంపెనీలు తయారుచేసిన వెరైటీ ఫోన్లను పరిచయం చేశాయి. వాటిలో ‘ఆనర్ కంపెనీ’ తయారుచేసిన ఫోన్ స్పెషల్ ఫీచర్స్తో బాగుంది అనిపించింది. ఇప్పటివరకు ఫోన్ ఆపరేట్ చేయాలంటే టైపింగ్, వాయిస్ అసిస్టెంట్ ఫెసిలిటీ ఉంది. అయితే, ఇప్పుడు వాటికి మించి, కంటిచూపుతో ఆపరేట్ చేసేలా ఈ టెక్నాలజీని డిజైన్ చేసింది కంపెనీ.
‘మ్యాజిక్ 6 ప్రొ’ పేరుతో ఐ ట్రాకింగ్ టెక్నాలజీతో ఫోన్స్ తయారు చేసింది. ఈ ఫీచర్ వాడేందుకు సింపుల్గా ఫోన్ ఆన్ చేసి, దానివైపు చూస్తే చాలు.. కంటిపాప ఎటువైపు ఫోకస్ చేస్తే అక్కడ ఉన్న దాన్ని ఫోన్ యాక్టివేట్ చేస్తుంది. ఉదాహరణకు ఫోన్ కాల్ వచ్చినప్పుడు ఫోన్ స్క్రీన్ మీద ఉన్న ఆకుపచ్చ రంగు ఫోన్ బొమ్మను చూస్తే ఫోన్ లిఫ్ట్ చేస్తుంది. ఎరుపు రంగు వైపు చూస్తే కాల్ కట్ చేస్తుంది. అంతేకాదు.. దీనిద్వారా మొబైల్ షాపింగ్, కార్ కూడా కంట్రోల్ చేయొచ్చు!
