- ఆయన మానవతావాది, దార్శనికుడు: మంత్రి దామోదర
హైదరాబాద్, వెలుగు: మాజీ ప్రధాని మన్మోహన్ సింగ్ గొప్ప మానవతావాది, దార్శనికుడు, ఆర్థిక రూపశిల్పి అని, ఆయన మరణం దేశానికి తీరని లోటని రాష్ట్ర వైద్య, ఆరోగ్య శాఖ మంత్రి దామోదర రాజనర్సింహ పేర్కొన్నారు. మన్మోహన్ సింగ్ ఆర్థికవేత్తగా, ప్లానింగ్ కమిషన్ వైస్ చైర్మన్గా, ఆర్బీఐ గవర్నర్గా, కేంద్ర ఆర్థిక శాఖ మంత్రిగా, దేశ ప్రధానిగా దేశంలో చెరగని ముద్ర వేశారని అన్నారు. మన్మోహన్ సింగ్ మృతిపై అసెంబ్లీలో సోమవారం సీఎం రేవంత్ రెడ్డి ప్రవేశపెట్టిన సంతాప తీర్మానాన్ని మంత్రి దామోదర రాజనర్సింహ బలపరిచారు.
మన్మోహన్ సింగ్కు భారతరత్న ఇవ్వాలని రాష్ట్ర ప్రభుత్వం ప్రతిపాదించిన తీర్మానానికి పూర్తి మద్దతు తెలియజేశారు. ఈ సందర్భంగా మంత్రి మాట్లాడారు. ప్రధానిగా మన్మోహన్ ఆర్థిక స్థిరత్వం, విద్య, వైద్యం, ఉపాధి రంగాలకు సంబంధించి చారిత్రక చట్టాలను రూపొందించారన్నారు. ఉపాధి హామీ పథకాన్ని తెచ్చి గ్రామీణ ప్రాంత ప్రజలు వలస పోకుండా ఉపాధి కల్పించారని తెలిపారు.
