వెలుగు బిజినెస్ డెస్క్: వచ్చే నెల 1వ తేదీ నుంచి కొత్తగా తీసుకునే హెల్త్, మోటార్, ట్రావెల్, హోమ్ ఇన్సూరెన్స్ పాలసీలకు నో యువర్ కస్టమర్ (కేవైసీ) డాక్యుమెంట్లు ఇవ్వడం తప్పనిసరి. ప్రీమియం మొత్తంతో సంబంధం లేకుండా అన్ని ఇన్సూరెన్స్ పాలసీలకు కేవైసీ డాక్యుమెంట్లను తప్పనిసరి చేస్తూ ఇన్సూరెన్స్ రెగ్యులేటరీ డెవలప్మెంట్ అథారిటీ (ఐఆర్డీఏ) ఆదేశాలు జారీ చేసింది. లైఫ్, జనరల్, హెల్త్ ఇన్సూరెన్స్ పాలసీలకు ఈ కొత్త రూల్ వర్తిస్తుంది. నాన్–లైఫ్ జనరల్ ఇన్సూరెన్స్పాలసీల కొనుగోలుకు ఇప్పటిదాకా కేవైసీ తప్పనిసరి కాదు. హెల్త్, ఆటో, ట్రావెల్ ఇన్సూరెన్స్లను నాన్–లైఫ్ ఇన్సూరెన్స్ లేదా జనరల్ ఇన్సూరెన్స్ పాలసీలుగా వ్యవహరిస్తారు. హెల్త్ ఇన్సూరెన్స్ విషయంలో మాత్రం క్లెయిమ్ సెటిల్మెంట్ టైములో కేవైసీ డాక్యుమెంట్లను అడుగుతున్నారు. క్లెయిమ్ అమౌంట్ రూ. లక్ష దాటితే పాలసీదారుడు పాన్, ఆధార్ కార్డులను ఇవ్వాల్సి ఉంటోంది. అంటే, ఇకమీదట పాలసీ తీసుకునే టైములోనే కేవైసీ రూల్స్ను పాటించాల్సి వస్తుందని పాలసీబజార్.కామ్ సీఈఓ సర్బ్వీర్ సింగ్ చెప్పారు.
ఇప్పటిదాక వాలంటరీ....
జనరల్ ఇన్సూరెన్స్ ప్రొడక్టులు కొనుగోలు చేయడానికి కేవైసీ డాక్యుమెంట్లను ఇవ్వడం ఇప్పటిదాకా వాలంటరీ. కానీ, జనవరి 1, 2023 నుంచి మాత్రం ఇది తప్పనిసరి. ఇప్పటికే పాలసీలను కొనుగోలు చేసిన కస్టమర్ల నుంచి కేవైసీ డాక్యుమెంట్లను నిర్ధారిత గడువులోగా తీసుకోమని ఇన్సూరెన్స్ కంపెనీలకు ఐఆర్డీఏ ఆదేశాలు జారీ చేసింది. కేవైసీ డిటెయిల్స్ను ఎస్ఎంఎస్, ఈమెయిల్ రూపంలో ఇవ్వాలని కస్టమర్లను ఇన్సూరెన్స్ కంపెనీలు కోరతాయని సర్బ్వీర్ సింగ్ పేర్కొన్నారు. అయితే, ప్రస్తుత కస్టమర్లకు కేవైసీ డిటెయిల్స్ ఇవ్వడం తప్పనిసరి మాత్రం కాదని వివరించారు. కానీ, జనవరి 1, 2023 తర్వాత పాలసీ రెన్యువల్కు వచ్చేటట్లయితే మాత్రం కేవైసీ డిటెయిల్స్ ఇవ్వక తప్పదు. ఒకవేళ ఇప్పటికే కేవైసీ డిటెయిల్స్, కాపీలను ఇవ్వకపోయినట్లయితే ఇన్సూరెన్స్ కంపెనీలను వెంటనే సంప్రదించి, ఇవ్వడం మేలని బజాజ్ క్యాపిటల్ ఎండీ సంజీవ్ బజాజ్ సూచించారు. కేవైసీ ఇవ్వకపోతే కొత్త ఇన్సూరెన్స్ పాలసీ కొనుగోలు, పాత పాలసీ రెన్యువల్లో ఇబ్బందులు ఎదుర్కోవలసి రావచ్చని పేర్కొన్నారు. ఒక ఫైనాన్షియల్ ఇయర్లో ఇన్సూరెన్స్ ప్రీమియం మొత్తం రూ. 50 వేలకి మించితేనే కస్టమర్లు ఇప్పటిదాకా పాన్కార్డు లేదా ఫార్మ్ 60 ను ఇవ్వాల్సి ఉంటోందని ఐసీఐసీఐ లంబార్డ్ చీఫ్ (అండర్రైటింగ్ ఆఫ్ క్లెయిమ్స్) సంజయ్దత్తా వివరించారు. ఇన్సూరర్ల దగ్గర పాలసీ హోల్డర్ల కేవైసీ వివరాలు అందుబాటులో ఉండటం వల్ల పాలసీల అండర్ రైటింగ్ సజావుగా జరుగుతుంది. వారు కొనుగోలు చేసే కవరేజ్కి అర్హత కూడా రికార్డవుతుందని బజాజ్ పేర్కొన్నారు. అన్నింటికీ మించి, ఇన్సూరెన్స్ కంపెనీలు సెంట్రలైజ్డ్ డేటా బ్యాంకును ఏర్పాటు చేయడం కుదురుతుంది. దీర్ఘకాలంలో ఇది అందరికీ మేలు చేస్తుందని సింగ్
చెప్పారు.
పాలసీ హోల్డర్లకు వచ్చే బెనిఫిట్లు....
కేవైసీ డాక్యుమెంట్లు ఉండటం వల్ల కస్టమర్ల గురించిన సమగ్ర సమాచారం ఇన్సూరెన్స్ కంపెనీలకు అందుబాటులోకి వస్తుంది. దీంతో క్లెయిమ్ ప్రాసెసింగ్ వేగంగా జరగడానికి ఛాన్స్ ఉంటుంది. అంతేకాకుండా, క్లెయిమ్స్లో ఫ్రాడ్స్ జరగకుండా, పేమెంట్లన్నీ పాలసీ హోల్డర్ల కు చెందిన లీగల్ హెయిర్స్కే చేరడం సాధ్యమవుతుందని సింగ్ పేర్కొన్నారు. కొనుగోలు టైములోనే కేవైసీ డాక్యుమెంట్లు ఇవ్వడం వల్ల క్లెయిట్ టైములో మరోసారి వాటిని ఇవ్వాల్సిన అవసరం కస్టమర్లకు తప్పుతుందని వివరించారు.
ఇన్సూరెన్స్ కంపెనీలకు కలిగే బెనిఫిట్లు....
పాలసీ హోల్డర్ల కేవైసీ వివరాలు ఉంటే రిస్క్ ఎసెస్మెంట్ మెరుగవడంతోపాటు, పాలసీ రేట్ల నిర్ణయమూ ఇన్సూరెన్స్ కంపెనీలకు సులభమవుతుంది. మోసపూరిత క్లెయిమ్లకు చెక్ పెట్టడమూ వాటికి సాధ్యపడుతుంది.ఓవరాల్గా కస్టమర్లకు మరింత మెరుగైన సేవలను, అనుభవాన్ని అందేలా చేయడం ఇన్సూరెన్స్ కంపెనీలకు వీలవుతుందని బజాజ్వివరించారు.
