- ఇద్దరు సీఎంలు తెలుసని టార్చర్
- ఆచూకీ తెలపకుండా ఇంటికి ఫోన్ చేసి బెదిరింపులు
- పోలీసుల జోక్యంతో విడుదల
జిన్నారం, వెలుగు: లెక్కల్లో తేడా రావడంతో వైన్షాపులో క్యాషియర్గా పనిచేస్తున్న వ్యక్తిని యాజమాన్యం కిడ్నాప్ చేసి చిత్రహింసలు పెట్టింది. తమకు తెలుగు రాష్ట్రాల సీఎంలు తెలుసని, మొబైల్, బ్యాంక్ స్టేట్మెంట్, వాట్సాప్ చాటింగ్ అన్ని తీసుకొని విపరీతంగా కొట్టినట్లు తెలుస్తోంది. బాధితుడి కథనం ప్రకారం.. సంగారెడ్డి జిల్లా జిన్నారం మండలం సోలక్ పల్లిలోని వజ్ర వైన్స్లో మన్నె వీరేశ్ క్యాషియర్గా పనిచేస్తున్నాడు. లెక్కల్లో తేడా వస్తోందని అతడిని శనివారం కారులో ఎక్కించుకున్న యాజమాన్యం బొల్లారంలోని శ్రీదేవి ప్రాజెక్టులోని ఆఫీసుకు తీసుకువెళ్లారు.
అక్కడ మాట్లాడగా వీరేశ్ రూ.8 లక్షల వరకు వాడుకున్నట్లు తేలింది. ఆ డబ్బు తిరిగి చెల్లిస్తానని చెప్పినా వినకుండా రాడ్లు, కట్టెలతో విపరీతంగా కొట్టారు. ఎవరితో చెప్పుకున్న లాభం లేదని, తమకు రెండు రాష్ట్రాల సీఎంలు తెలుసని టార్చర్ పెట్టారు. ఇంటి నుంచి వీరేశ్ భార్య ఫోన్ చేయగా..డబ్బులు కట్టకుంటే ఆమెను కూడా కిడ్నాప్ చేస్తామని బెదిరించారు. దీంతో వీరేశ్ భార్య మమత పోలీసులను ఆశ్రయించింది. దీంతో జిన్నారం సీఐ సుధీర్ కుమార్.. వైన్స్ యాజమాన్యానికి ఫోన్ చేశారు. దీంతో ఆదివారం సాయంత్రం 6 గంటల ప్రాంతంలో బాధితుడిని ఠాణా వద్ద వదిలేసి వెళ్లారు. పోలీసులు కేసు నమోదు చేసుకొని దర్యాప్తు ప్రారంభించారు.
