రాంచీ: ఎన్నిసార్లు చెప్పినా వినకుండా తాము పవిత్రంగా భావించే చెట్లను నరికేస్తున్న వ్యక్తిని గ్రామస్తులంతా కలిసి కొట్టి చంపేశారు. తరువాత డెడ్బాడీకి నిప్పుపెట్టారు. ఈ దారుణ ఘటన జార్ఖండ్ సిండేగా జిల్లాలోని చప్రిదీప గ్రామంలో మంగళవారం జరిగింది. ఆదివాసీలు పవిత్రంగా పూజించే చెట్లను గ్రామానికి చెందిన సంజు ప్రదాన్ నరికేశాడు. ఆ చెట్లను నరకొద్దని గ్రామస్తులు హెచ్చరించినా వినలేదు. ఇంతకుముందు కూడా ఇలాగే చెట్లను కొట్టేస్తే గ్రామస్తులు పోలీసులకు కంప్లైంట్ చేశారు. ఇటీవల కూడా సంజూ అదే పని చేయడంతో దీనిపై మాట్లాడడానికి రావాలని గ్రామస్తులు ఆయనను పిలిచారు. అయితే ఆ మీటింగ్కు సంజూ వెళ్లలేదు. దీంతో కోపంతో ఊగిపోయిన గ్రామస్తులు అతన్ని ఇంట్లోంచి బయటికి లాక్కొచ్చారు. బెస్రాజరా గ్రామశివారులో మీటింగ్ జరిగే ప్రాంతానికి దగ్గరలోని మార్కెట్ వద్దకు తీసుకొచ్చి దారుణంగా కొట్టి చంపారు. ఆపై డెడ్బాడీని తగలబెట్టే ప్రయత్నం చేశారు. సమాచారం అందుకున్న పోలీసులు అక్కడికి చేరుకుని, డెడ్బాడీని స్వాధీనం చేసుకున్నారు. సుమారు 500 మంది ఈ దాడిలో పాల్గొని ఉండొచ్చని తెలిపారు. మరణించిన వ్యక్తిపై మూడు ఎఫ్ఐఆర్లు ఉన్నాయని, అతను సీపీఐ (మావోయిస్టు) గ్రూప్ మెంబర్ అని కొలెబిరా పోలీస్ స్టేషన్ ఆఫీసర్ చెప్పారు. ఇటీవలే బెయిల్పై రిలీజ్ అయ్యాడన్నారు.
