2035 నాటికి భారతదేశం సొంత స్పేస్ స్టేషన్ భారత్ స్పేస్ స్టేషన్(బీఏఎస్)ను నిర్మించనున్నది. ఇందుకోసం ఇస్రో ప్రణాళికలు రూపొందించిందని బెంగళూరులోని యూఆర్ రావు శాటిలైట్ సెంటర్లో జరిగిన కన్నడ సాంకేతిక సదస్సులో కేంద్ర సైన్స్ అండ్ టెక్నాలజీ మంత్రి డాక్టర్ జితేంద్ర సింగ్ ప్రకటించారు.
భూమి ఉపరితలానికి 400 నుంచి 450 కిలోమీటర్ల ఎత్తులో నిర్ణీత కక్ష్యలో 52 టన్నుల బరువు ఉండే భారత అంతరిక్ష కేంద్రాన్ని ఇస్రో ప్రవేశపెట్టనున్నది. అయితే, దానిలోకి ముందుగా ముగ్గురు వ్యోమగాములను పంపనున్నది. దీనిని భవిష్యత్తులో ఆరుగురికి పెంచాలని యోచిస్తున్నది.
బీఏఎస్ అనేది లైఫ్ సైన్సెస్, మెడిసిన్ రంగాల్లో శాస్త్రీయ పరిశోధనలకు మద్దతు ఇచ్చేందుకు, అంతరిక్ష పరిశోధనలను మెరుగుపరిచేందుకు భారత్ అభివృద్ధి చేస్తున్న మాడ్యులర్ స్పేస్ స్టేషన్. తొలి మాడ్యుల్స్ను పలు దశల్లో నింగిలోకి పంపించి, ఆ తర్వాత అంతరిక్షంలోనే వాటిని అనుసంధానిస్తారు. 2035 నాటికి స్పేస్ స్టేషన్ పూర్తవుతుంది. ఈ ప్రాజెక్ట్ లక్ష్యం యువ శాస్త్రవేత్తలను ప్రోత్సహించడంతోపాటు అంతరిక్షరంగంలో కొత్త వ్యాపార అవకాశాలను సృష్టించడం.
ప్రస్తుతం అంతరిక్షంలో ఒకే స్పేస్ స్టేషన్ ఉన్నది. ఈ స్టేషన్ను నాసా అనేక దేశాల సహకారంతో నిర్మించింది. ప్రస్తుతం చైనా సొంతంగా ఇంటర్నేషనల్ స్పేస్ స్టేషన్ను నిర్మిస్తున్నది.
