భారతదేశంలో ఇప్పటికే కరోనా విజృంభిస్తుంటే మరోవైపు తుపాను ముప్పు ముంచుకొస్తుంది. మే 14 వరకు అరేబియా సముద్రంలో అల్ప పీడనం ఏర్పడే సూచనలు కనిపిస్తున్నాయని.. మరికొద్ది రోజుల్లో తుపాన్ వచ్చే సంకేతాలు ఉన్నట్లు భారత వాతావరణ శాఖ హెచ్చరించింది. ఇది క్రమంగా ఈ నెల 16 నాటికి బలపడి వాయువ్య దిశగా కదిలే అవకాశం ఉందని.. బలపడిన అల్పపీడనం క్రమంగా తుపానుగా మారే అవకాశం ఎక్కువగా ఉందని హెచ్చరించింది.
ఒకవేళ ఇది భారత తీరాన్ని తాకితే ఈ ఏడాది దేశంలో ఇదే మొదటి తుఫాన్ అవుతుందన్నారు. ఈ తుఫాన్కు తౌక్టే అని పేరు పెట్టారు. దీని ప్రభావంతో కేరళ, లక్షద్వీప్, కర్నాటక, తమిళనాడు ప్రాంతాల్లో వర్షాలు కురిసే అవకాశం ఉందని అధికారులు తెలిపారు. ఈ రాష్ట్రాల్లోని తీర ప్రాంతాల్లో మత్స్యకారులు ఈ నెల 14 నుంచి సముద్రంలో వేటకు వెళ్లరాదని హెచ్చరించారు వాతావరణ శాఖ అధికారులు.
