స్టాక్​మార్కెట్లు ఇంతలా  పెరగడం ఇది రెండోసారి

• 1564 పాయింట్లు దూసుకెళ్లిన సెన్సెక్స్
• నిఫ్టీ 440 పాయింట్లు జూమ్​

వెలుగు, బిజినెస్​ డెస్క్​: మన స్టాక్​ మార్కెట్లు మంగళవారం దుమ్ము రేపాయి. అమెరికాతోపాటు ఇతర గ్లోబల్​ మార్కెట్లు సానుకూలంగా ఉండటంతో సెన్సెక్స్​ ఏకంగా 1564 పాయింట్లు, నిఫ్టీ 440 పాయింట్లు దూసుకెళ్లాయి. దీంతో ఇన్వెస్టర్లకు పంట పండింది. వారి సంపద ఒకే రోజు రూ. 5.65 లక్షల కోట్లు ఎగసింది. ఫెడ్​ ఛైర్మన్​ సిగ్నల్​తో శుక్రవారం మన మార్కెట్లు కూడా భారీగా పతనమైన విషయం తెలిసిందే. మంగళవారం సెషన్లో  బ్యాంకింగ్, ఫైనాన్షియల్​ షేర్లు వెలుగులో నిలిచాయి. ఈ ఏడాదిలో స్టాక్​మార్కెట్లు ఇంతలా  పెరగడం ఇదే రెండోసారి. రూపాయి బలపడటం కూడా మార్కెట్​కు కలిసి వచ్చింది.నిఫ్టీ ఫైనాన్షియల్​ సర్వీసెస్​ ఇండెక్స్​ 3.42 శాతం, నిఫ్టీ బ్యాంక్​ ఇండెక్స్​ 3.29 శాతం పెరగడంతోపాటు, నిఫ్టీ ఐటీ, ఆటో ఇండెక్స్, మిడ్​క్యాప్​ 50, స్మాల్​ క్యాప్​ 50 ఇండెక్స్​లూ ఎగిశాయి. 

బజాజ్​ ఫిన్​సర్వ్​ టాప్​ గెయినర్​....

సెన్సెక్స్​ షేర్లలో బజాజ్​ ఫిన్​ సర్వ్​ టాప్​ గెయినర్​గా నిలవగా, బజాజ్​ ఫైనాన్స్​, ఇండస్​ ఇండ్​ బ్యాంక్, టెక్​ మహీంద్రా, ఐసీఐసీఐ బ్యాంక్, కోటక్ మహీంద్రా బ్యాంకుల షేర్లు కూడా లాభాల్లో ముగిశాయి. ఏషియన్​ మార్కెట్లలో సౌత్​ కొరియా కోస్పి, జపాన్​ నికీ పెరగ్గా, చైనా షాంఘై కాంపోజిట్​ ఇండెక్స్​ మాత్రం పడింది. ​మంగళవారం ట్రేడింగ్​లో బ్యాంకింగ్​ షేర్లకు భారీగా కొనుగోళ్ల మద్దతు దొరికింది. హెచ్​డీఎఫ్​సీ బ్యాంక్​, ఐసీఐసీఐ బ్యాంక్​, బజాజ్​ ఫైనాన్స్​, హెచ్​డీఎఫ్​సీ, ఎస్​బీఐ లు ఇండెక్స్​ 250 పాయింట్లు పెరగడానికి కారణమయ్యాయి. 

యూఎస్​ ఫ్యూచర్ల మద్దతు....

వరసగా రెండు సెషన్లు నష్టపోయిన యూఎస్​ మార్కెట్లు పుంజుకోవడం మన మార్కెట్​కు సపోర్ట్​గా నిలిచింది. ఎస్​ అండ్​ పీ ఫ్యూచర్స్​ మార్కెట్ కొద్దిపాటి లాభాలతోనే ట్రేడయినా, యూఎస్​ మార్కెట్లు బలంగా నిలబడతాయనే సంకేతాలివ్వడంతో మన మార్కెట్లు దూసుకెళ్లాయని ఎనలిస్టులు చెబుతున్నారు. 

చమురు రేట్లు తగ్గాయ్​....

చమురు రేట్లు అంతకు ముందు సెషన్​తో పోలిస్తే మంగళవారం కొద్దిగా తగ్గాయి. మార్కెట్లు భారీగా పెరగడానికి ఇది కూడా ఊతమిచ్చింది. గ్లోబల్​గా సెంట్రల్​ బ్యాంకులు వడ్డీ రేట్ల పెంపుదల వైపు చూస్తున్న నేపథ్యం ఎకనమిక్ స్లో డౌన్​కు దారి తీస్తుందని, ఫలితంగా చమురు డిమాండ్​ తగ్గొచ్చని రాయిటర్స్​ రిపోర్ట్​ చేసింది. బ్రెంట్​ క్రూడ్​ ఫ్యూచర్స్​ (అక్టోబర్​ సెటిల్​మెంట్​) 56 సెంట్లు తగ్గి 104.53 డాలర్లకు చేరింది. బ్రెంట్​ క్రూడ్ ​ఫ్యూచర్స్​ నవంబర్​ కాంట్రాక్టు 102.57 డాలర్ల వద్ద ట్రేడవుతోంది.​ 

రూపాయి సపోర్ట్​...
మరోవైపు డాలర్​ ఇండెక్స్​108.70 పాయింట్ల వద్ద నిలిచింది. ఇంతకు ముందు సెషన్​తో పోలిస్తే ఈ ఇండెక్స్​ కూడా  తగ్గింది. యూరో బలపడటమే దీనికి కారణం.  ఇది స్టాక్​ మార్కెట్లకు బాగా కలిసొచ్చే అంశం. డాలర్​తో పోలిస్తే మన కరెన్సీ రూపాయి మంగళవారం ట్రేడింగ్​లో బలపడింది. ముందు రోజు 79.81 గా ఉన్న రూపాయి మారకపు విలువ ఈ సెషన్లో 79.96 వద్ద ముగిసింది. ఈ నెలలో  ఫారిన్​ ఇన్వెస్టర్లు మన షేర్లలో 6 బిలియన్ డాలర్లను కుమ్మరించారు. డిసెంబర్​ 2020 నుంచి చూస్తే ఒకే నెలలో ఇంత ఎక్కువ విదేశీ పెట్టుబడులు రావడం ఇదే మొదటిసారని ఎనలిస్టులు తెలిపారు.