- యూనికార్న్ క్లబ్లోకి డార్విన్ బాక్స్
- తాజాగా రూ.537 కోట్ల ఫండింగ్
హైదరాబాద్, వెలుగు: కంపెనీలకు హెచ్ఆర్ సేవలు అందించే హైదరాబాద్ స్టార్టప్ డార్విన్ బాక్స్ యూనికార్న్ క్లబ్లోకి చేరింది. తాజాగా దీనికి 72 మిలియన్ డాలర్ల (దాదాపు రూ.537 కోట్లు) ఫండింగ్ అందడంతో వాల్యుయేషన్ బిలియన్ డాలర్లకు పెరిగింది. ఫలితంగా యూనికార్న్ స్టార్టప్గా ఎదిగింది. హైదరాబాద్లోని గచ్చిబౌలి ఆఫీసులో మంగళవారం నిర్వహించిన మీడియా సమావేశంలో డార్విన్ బాక్స్ ఫౌండర్స్ వివరాలను వెల్లడించారు. సేల్స్ఫోర్స్ వెంచర్స్, సీకోవియా ఇండియా, లైట్స్పీడ్ ఇండియా, ఎండియా పార్ట్నర్స్, 3ఇన్డీఈవైట్, జేజీజీ వంటి పాత ఇన్వెస్టర్లతో పాటుగా నెట్ఫ్లిక్స్, మెటా, స్పాటిఫై , ఎయిర్బీఎన్బీ వంటి కంపెనీలకు మద్దతు ఇచ్చిన టెక్నాలజీ క్రాస్ఓవర్ వెంచర్స్ (టీసీవీ) ప్రస్తుత రౌండ్కు నాయకత్వం వహించిందని చెప్పారు. ఈ రౌండ్తో కలుపుకుంటే కంపెనీ ఇప్పటివరకు సేకరించిన మొత్తం పెట్టుబడి 110 మిలియన్ డాలర్లకు (సుమారు రూ. 820 కోట్లు) చేరుకుంది. హైదరాబాద్లో ఏర్పాటైన మరో రెండు కంపెనీలు - జెనోటి, హైరేడియస్ కూడా - యూనికార్న్గా మారాయి, ఇవి మొదట హైదరాబాద్లో బిజినెస్ చేసి అమెరికా వెళ్లాక యునికార్న్గా ఎదిగాయి. చైతన్య పెద్ది, జయంత్ పాలేటి, రోహిత్ చెన్నమనేని అనే ముగ్గురు టెకీలు డార్విన్ బాక్స్ను 2015లో స్థాపించారు. ఈ స్టార్టప్ను మొదలుపెట్టడానికి ముందు కార్పొరేట్ కంపెనీల్లో పనిచేశారు. ఒరాకిల్, శాప్లు అందించే హెచ్ఆర్ సేవలనూ డార్విన్బాక్స్ అందిస్తుంది. ఈ సెక్టార్లో గ్లోబల్ కంపెనీలకు గట్టి పోటీనిచ్చే ఏకైక భారతీయ కంపెనీ తమదేనని ఫౌండర్లు ప్రకటించారు. ‘‘ఈ తాజా ఇన్వెస్ట్మెంట్తో మా బిజినెస్ మరింత ముందుకు వెళ్తుంది. మా కెపాసిటీని మరింత పెంచుకోగలుగుతాం. ఎంప్లాయ్ మరింత బాగా, ఈజీగా పనిచేయగలిగేలా మేం టెక్నాలజీని తయారు చేశాం”అని జయంత్ పాలేటి వివరించారు.
అమెరికాలోనూ ఆఫీసు..
కంపెనీని విస్తరించడానికి కూడా ఈ డబ్బును వాడుతామని, ఇతర దేశాల్లోనూ సేవలు అందిస్తామని డార్విన్బాక్స్ ప్రకటించింది. ప్రొడక్ట్, ఇంజనీరింగ్, కస్టమర్ సక్సెస్ టీమ్లను బలోపేతం చేస్తామని ప్రకటించింది. సౌత్ ఏషియా, సౌత్ ఈస్ట్ ఏషియా, మిడిల్ ఈస్ట్ కంట్రీల్లో బిజినెస్ను పెంచుతామని వెల్లడించింది. ఇదే ఏడాది అమెరికాలోనూ కాలుపెట్టడానికి ఏర్పాట్లు చేస్తోంది. ప్రస్తుతం ఉన్న ఉద్యోగుల సంఖ్యను త్వరలో రెట్టింపు చేయనుంది. ఇప్పుడు 12 గ్లోబల్ ఆఫీసుల్లో 700 మందికిపైగా పనిచేస్తున్నారు. కంపెనీ ఇప్పటి వరకు 650 లార్జ్ ఎంటర్ప్రైజెస్లకు సేవలను అందించింది. ఇది వర్క్ఫోర్స్ మేనేజ్మెంట్, ఎంప్లాయ్ ఎంగేజ్మెంట్, కాంపన్సేషన్ అండ్ బెనిఫిట్స్, పీపుల్ ఎనలిటిక్స్, హెచ్ఆర్ సర్వీస్ డెలివరీ సూట్స్ వంటి సొల్యూషన్స్ను అందిస్తుంది. మనదేశంలో ఇప్పటివరకు 83 స్టార్టప్లు యూనికార్న్లుగా ఎదగగా, డార్విన్బాక్స్ 84వ స్టార్టప్. ఈ నెలలో ఎనలిటిక్స్ ఎస్ఏఏఎస్ ‘ఫ్రాక్టల్’, ఎడ్యుటెక్ స్టార్టప్ లీడ్ స్కూల్లకు యూనికార్న్ హోదా వచ్చింది. అయితే హైదరాబాద్లో తగిన వెంచర్ క్యాపిటల్ ఎకోసిస్టమ్ లేకపోవడంతో సిటీకి చెందిన చాలా స్టార్టప్లు బెంగళూరుకు మారుతున్నాయి. డార్విన్ బాక్స్ మాత్రం ఇక్కడి నుంచే సేవలు అందిస్తూ భారీగా నిధులను సంపాదించింది.
