జ్యూస్ షాపుకి మీతోపాటు కాగితం లేదా స్టీల్ స్ట్రా పట్టుకుని ఎంతమంది వెళ్తారు? మీ పాత స్మార్ట్ఫోన్ లేదా కాఫీ కప్పు ప్లాస్టిక్ మూతను ఎన్విరాన్మెంట్కి నష్టం కలగకుండా ఎలా డిస్పోజ్ చేయొచ్చని ఆలోచించారా? చాలామందికి ఈ విషయాల గురించే పట్టించుకోరు. కానీ కొందరు మాత్రం వీటి గురించి ఆలోచించి, ప్రాక్టీస్ చేసి... నలుగురికీ ఆ విషయాల గురించి అవగాహన కలిగించడమే పనిగా పెట్టుకుంటారు. అలాంటి వాళ్లలో ఒకరు నయన ప్రేమ్నాథ్. అందుకే ఫోర్బ్స్ ఇన్ఫ్లుయెన్సర్ జాబితాలో ఒకరుగా నిలిచింది. తన యూట్యూబ్ జర్నీ రకరకాల మలుపులు తిరుగుతూ ఇక్కడ ‘సస్టెయిన్’ అయ్యానంటున్న ఆమె మాటల్లోనే మిగతా వివరాలు...
‘‘మాది తిరువనంతపురం. కానీ ఇప్పుడు బెంగళూరులో ఉంటున్నాం. యూట్యూబర్గా మారకముందు ఆర్కిటెక్ట్గా కొన్నాళ్లు పని చేశా. తరువాత డిజిటల్ కంటెంట్ క్రియేటర్గా మారి, చివరకు లో–వేస్ట్ ప్రాక్టీషనర్ని అయ్యా. సస్టెయినబిలిటీ లైఫ్ స్టయిల్ ఎడ్యుకేటర్, కన్సల్టెంట్, రైటర్గా మారా. నా యూట్యూబ్ జర్నీ గురించి చెప్పాలంటే డైరెక్ట్గా ఒక సబ్జెక్ట్ మీద మొదలుకాలేదు. స్టార్ట్ అయిన దగ్గర్నించీ చాలా మలుపులు తీసుకుంది. మ్యూజిక్ కవర్స్ చేసేదాన్ని మొదట్లో. ఆ తరువాత బ్యూటీ, ఫ్యాషన్, లైఫ్స్టయిల్ వీడియోలు చేశా. అవన్నీ చేస్తూ ఫైనల్ డెస్టినేషన్ మాత్రం సస్టెయినబిలిటీ దగ్గరకి వచ్చి ఆగింది.
రెస్పాన్స్ ఊహించలేదు
లో–వేస్ట్ జర్నీ వీడియోలు మొదలుపెట్టినప్పుడు ఈ సబ్జెక్ట్ మీద వీడియోలు ఎంతమంది చూస్తారు అనే అనుమానం ఒక మూల ఉండేది. అయినప్పటికీ నా మనసుకు బాగా దగ్గరగా ఉన్న ఈ టాపిక్ను వదిలిపెట్టకూడదు అనుకున్నా. 2019 నుంచి లో వేస్ట్ లైఫ్ స్టయిల్ జర్నీ మొదలుపెట్టా. ఒక్క యూట్యూబ్లోనే కాకుండా... లింక్డిన్, ఇన్స్టా, వెబ్సైట్, బ్లాగ్ అన్నింటిలో చాలామంచి రెస్పాన్స్ వస్తోంది. పర్యావరణాన్ని దెబ్బతీయకుండా మనకు నచ్చినట్టు ప్రకృతితో కలిసి బతకొచ్చు. ఈ విషయాన్నే ప్రాక్టికల్గా వ్యూయర్స్, ఫాలోయర్స్తో పంచుకుంటున్నా.
ఎకో – యూట్యూబర్
లో వేస్ట్ లైఫ్ స్టయిల్ జర్నీని ప్రమోట్ చేయడం మొదలుపెట్టినప్పుడు ఆ లైఫ్ స్టయిల్ గురించి నాకు పూర్తి అవగాహన లేదు. ప్రతిరోజు కొత్త విషయాలు నేర్చుకుంటూ వాటిని సాధ్యమైనంత వరకు నా రోజూవారీ జీవితంలో ప్రాక్టికల్గా చేస్తూ అవేర్నెస్ తెచ్చుకుని నన్ను నేను ఎకో– యూట్యూబర్గా మార్చుకున్నా. జీవితానికి ఒక అర్థం ఉండాలి అనుకున్నా. అలా నా మైండ్సెట్ మార్చుకుని సోషల్ మీడియాను ఒక టూల్గా చేసుకున్నా. కార్బన్ ఫుట్ప్రింట్ ను తగ్గించి, ఎకో ఫ్రెండ్లీగా ప్రయత్నానికి దారులు వెతుకుతూ వాటి గురించి అవగాహన కల్పించే పని చేస్తున్నా. లో–వేస్ట్ లివింగ్, సెల్ఫ్ ఎంపవర్మెంట్, బాడీ పాజిటివిటీ, ప్రొడక్టివిటీ, ఎథికల్ ఫ్యాషన్, సెల్ఫ్ కేర్, ఆర్గానిక్ స్కిన్ కేర్లను ప్రాక్టీస్ చేస్తున్నా. ఈ మధ్య చాలామంది గ్రీన్ లైఫ్స్టయిల్ ఫాలో అవుతున్నారు. అయితే ఈ ట్రెండ్ ఇంకా పెరగాలి.
బాడీ పాజిటివిటీ అవసరం
మెనుస్ట్రువల్ కప్స్ గురించి వీడియో చేయకముందు నా వెబ్సైట్ నయన ప్రేమ్నాథ్లో పోస్ట్ చేస్తే వెబ్సైట్ ఫాలో అవుతున్న వాళ్ల నుంచి మంచి ఫీడ్ బ్యాక్ వచ్చింది. ఆ తరువాతే మెనుస్ట్రువల్ కప్స్ గురించి వీడియో అప్లోడ్ చేశా. ఈ వీడియో ద్వారా మెనుస్ట్రువల్ కప్ వాడటం వల్ల కలిగే ఉపయోగం గురించి ఎక్కువమందికి చెప్పాలి అనుకున్నా. నా యూట్యూబ్లో బాడీ పాజిటివిటీ మీద కూడా వీడియోలు చేశా. బాడీ పాజిటివిటీ గురించి మాట్లాడాలంటే నేనే ఒక ఎగ్జాంపుల్. బక్కపలచగా ఉంటానని చాలాసార్లు బాడీ షేమింగ్ ఎదుర్కొన్నా నేను. అప్పుడే నాకు బాడీ పాజిటివిటీ మీద దృష్టి పెట్టాలి అనిపించింది. సోషల్ మీడియాలో వీడియోలు, షాట్స్, రీల్స్ చేయడమే కాకుండా లో–వేస్ట్ లైఫ్స్టయిల్ గురించి సెషన్స్ కూడా కండక్ట్ చేస్తా. ఆ సెషన్స్లో మన లైఫ్స్టయిల్లో ఎకో ఫ్రెండ్లీ ప్రొడక్ట్స్ ఎలా వాడొచ్చో అవేర్నెస్ ఇస్తా. మన డెయిలీ లైఫ్లో ఏ ప్రొడక్ట్ వాడినా ఎన్విరాన్మెంట్కి హాని చేయనివి వాడాలి. అప్పుడే నెక్స్ట్ జనరేషన్కి నేచర్ ఫ్రెండ్లీ జీవితాన్ని ఇచ్చిన వాళ్లం అవుతాం. కొన్ని వ్యక్తిగత కారణాల వల్ల పోయినేడాది యూట్యూబ్ వీడియోలు రెగ్యులర్గా అప్లోడ్ చేయలేదు. కానీ ఇక నుంచి ప్రతి గురువారం సాయంత్రం ఆరు గంటలకు ఒక కొత్త వీడియో అప్లోడ్ చేస్తా. షార్ట్స్ అయితే వారానికి రెండు అప్లోడ్ చేస్తా.’’
