నిర్మాణ ఖర్చు పెరిగింది

• ఇంకా 8–9 శాతం పెరగొచ్చు​

న్యూఢిల్లీ: ఇండ్ల నిర్మాణ ఖర్చు గత ఏడాది కాలంలో 10 నుంచి 12 శాతం పెరిగిందని ప్రాపర్టీ కన్సల్టెంట్​ కాలియర్స్​ ఇండియా ఒక రిపోర్టులో తెలిపింది. సిమెంటు, స్టీలు, ఇతర ఖర్చులు పెరగడం వల్లే నిర్మాణ వ్యయం అధికమైందని పేర్కొంది. ఈ ఏడాది డిసెంబర్​లోగా ఈ నిర్మాణ ఖర్చు మరో 8–9 శాతం పెరిగే ఛాన్స్​ ఉందని కూడా వెల్లడించింది. సప్లయ్​ సమస్యల వల్ల ముడి సరుకుల ఖర్చు అధికమైందని వివరించింది. సిమెంట్​, స్టీలు వంటి మెటీరియల్స్​ఈ నెల మొదటికే 20 శాతం పైగా పెరిగాయని కాలియర్స్​ ఇండియా రిపోర్టు తెలిపింది. కొవిడ్​–19 క్రైసిస్​ నుంచి ఇప్పుడిప్పుడే బయటపడుతున్న నేపథ్యంలో డెవలపర్లు రేట్లు పెంచడానికి వెనుకంజ వేస్తున్నట్లు పేర్కొంది. ఖర్చు బాగా పెరగడంతో ఇప్పుడిప్పుడే వాటిని రివ్యూ చేయడం మొదలు పెట్టినట్లు తెలిపింది. మొత్తం కన్​స్ట్రక్షన్​ ఖర్చులో మెటీరియల్స్​ ఖర్చు మూడింట రెండొంతులు ఉండటంతో ఇండ్ల రేట్లను పెంచడం డెవలపర్లకు తప్పకపోవచ్చని అభిప్రాయపడింది. గత కొన్నేళ్లుగా పెద్దగా మార్జిన్లు లేకుండానే డెవలపర్లు మనుగడ సాగిస్తున్నారని కాలియర్స్​ రిపోర్టు వివరించింది. అందుబాటు ధరలు, మిడ్​ సెగ్మెంట్లలో ఇండ్లు కట్టే డెవలపర్లపైనే ఎక్కువ ఎఫెక్ట్​పడుతుందని, ఎందుకంటే వీరే తక్కువ మార్జిన్లతో వ్యాపారం చేస్తున్నారని కాలియర్స్​ ఇండియా సీఈఓ రమేష్​నాయర్​ చెప్పారు. హోల్​సేల్​ ప్రైస్​ ఇండెక్స్​, మెటీరియల్​ ఖర్చులు రెండూ రెండంకెల పెరుగుదల రికార్డు చేశాయని పేర్కొన్నారు.  ఏడాది కిందట చదరపు అడుగుకు రూ. 2,060 గా ఉన్న సగటు నిర్మాణ ఖర్చు ఈ ఏడాది మార్చి నాటికి రూ. 2,300 కి చేరినట్లు వెల్లడించారు. ఇందులో జీఎస్​టీని కలపలేదని పేర్కొన్నారు.