- ఖానాపూర్ ఎమ్మెల్యే వెడ్మ బొజ్జు
- మహిళల గురించి బీఆర్ఎస్ నేతలు మాట్లాడడం హాస్యాస్పదమని వ్యాఖ్య
హైదరాబాద్, వెలుగు: కాళేశ్వరం, లిక్కర్ స్కామ్ కన్నా పెద్ద కుంభకోణం ధరణిలో జరిగిందని ఖానాపూర్ కాంగ్రెస్ ఎమ్మెల్యే వెడ్మ బొజ్జు అన్నారు. ధరణి వల్ల జోడేఘాట్లోనూ పాత భూస్వాములు వచ్చి కబ్జాలకు పాల్పడుతున్నారని ఆరోపించారు. శుక్రవారం అసెంబ్లీలో ధరణిపై చర్చ సందర్భంగా మాట్లాడారు. సూర్యాపేట జిల్లాలో ప్రతాప్ రెడ్డి కుటుంబ సభ్యులకు రైతుబంధు పడుతుంటే.. అది వారి భూమి కాదని గత సర్కారుకు చెప్పినా క్లియర్ చేయలేదన్నారు.
ఆదిలాబాద్ జిల్లాలోని భూములను ఇతర జిల్లాలకు పైడి రవీందర్ రావు బదలాయించారని, అది తీవ్రమైన నేరమన్నారు. దానిపై విచారణ జరిపించాలన్నారు. పోడు భూములకు పట్టాలు ఇస్తామని చెప్పి గత బీఆర్ఎస్ సర్కారు మోసం చేసిందన్నారు. చాలా భూములను జాయింట్ సర్వే చేయలేదని,ఆ పని చేయించాల్సిన అవసరం ఉందన్నారు. ఆడబిడ్డల గౌరవం గురించి బీఆర్ఎస్ నేతలు మాట్లాడుతుంటే విడ్డూరంగా ఉందని, బీఆర్ఎస్ పాలకులు గిరిజన ఆడబిడ్డలను బట్టలూడదీసి గుంజుకెళ్లలేదా అని ఫైర్ అయ్యారు.
