బషీర్ బాగ్, వెలుగు: బ్యాంక్ యాప్లో ప్రాబ్లమ్ ఉందని ఆన్లైన్లో ఫిర్యాదు చేసిన వృద్ధుడి నుంచి సైబర్ నేరగాళ్లు రూ.1.67 లక్షలు కొట్టేశారు. సైబర్ క్రైమ్ ఏసీపీ శివ మారుతి తెలిపిన ప్రకారం.. హైదరాబాద్ సిటీకి చెందిన 82 ఏండ్ల రిటైర్డ్ ప్రభుత్వ ఉద్యోగి పంజాబ్ నేషనల్ బ్యాంక్ వన్ యాప్ వాడుతున్నాడు. అందులో ప్రాబ్లమ్ తలెత్తడంతో ఆన్లైన్ ద్వారా న్యూఢిల్లీ హెడ్ ఆఫీస్కు ఫిర్యాదు చేశాడు. అనంతరం బాధిత వృద్ధుడికి బ్యాంక్ నుంచి అంటూ సైబర్ నేరగాళ్లు ఫోన్ చేశారు. వాట్సాప్కు ఒక ఫైల్పంపించామని, దాన్ని ఇన్స్టాల్ చేసుకుంటే 24 గంటల్లో సమస్య పరిష్కారం అవుతుందని సూచించారు.
మరుసటి రోజు సమస్య పరిష్కారం కాకపోవడంతో బాధితుడికి వాట్సాప్లో వీడియో కాల్ చేసిన చీటర్స్.. మరిన్ని వివరాలను అడిగి తెలుసుకున్నారు. అనంతరం బాధితుడు తన అకౌంట్ నుంచి నగదు బదిలీ చేయడానికి ప్రయత్నించగా, సాధ్యం కాలేదు. దీంతో అకౌంట్లో బ్యాలెన్స్ చెక్ చేసుకోగా, రూ 1.67 లక్షలు బదిలీ అయినట్లు చూసి ఖంగుతిన్నాడు. మోసపోయానని గ్రహించి సైబర్ క్రైమ్ పోలీసులకు శుక్రవారం ఫిర్యాదు చేశాడు. బాధితుడి ఫిర్యాదుతో కేసు నమోదు చేసి దర్యాప్తు చేస్తున్నట్లు ఏసీపీ వెల్లడించారు.
