తిరుమల, వెలుగు: తిరుమల శ్రీవారి దగ్గర 85 టన్నుల చెల్లని నాణేలున్నాయట. వాటిలోని కొన్ని మినహా మిగతా నాణేలను కరిగించేందుకు తిరుమల తిరుపతి దేవస్థానం (టీటీడీ) సిద్ధమవుతోంది. స్టీల్ అథారిటీ ఆఫ్ ఇండియా (సెయిల్)తో ఒప్పందం కుదుర్చుకుంది. 2011లో పావలా నాణేలను రిజర్వ్ బ్యాంక్ ఆఫ్ ఇండియా రద్దు చేసింది. అయినా 2014 వరకు బ్యాంకులు టీటీడీ నుంచి ఆయా కాయిన్లను డిపాజిట్ చేయించుకున్నాయి. తర్వాత వద్దన్నాయి. దీంతో అప్పటి నుంచి భక్తులు హుండీలో వేస్తున్న ఇలాంటి చెల్లని నాణేలు దాదాపు 85 టన్నులకు చేరాయి.
టన్నుకు రూ.30 వేల చొప్పున సెయిల్కు అమ్మేలా టీటీడీ ఒప్పందం చేసుకుంది. అయితే, డబ్బులు తీసుకోవడానికి బదులు, లడ్డూలు పెట్టే ట్రేలు తీసుకోవాలని నిర్ణయించింది. అంతకుముందు సెయిల్ నుంచే కొనుగోలు చేసిన స్టీల్ ట్రేల క్వాలిటీ బాగుండడంతో, ఇప్పుడూ ట్రేలే తీసుకోవడానికి ఒప్పందం చేసుకుంది. ప్రస్తుతం టీటీడీ వద్ద ఆరు రకాల నాణేలున్నాయి. అల్యూమినియం, కప్రోనికల్, ఇత్తడి, నికెల్, స్టీల్, రాగి నాణేలు అందులో ఉన్నాయి. ఇత్తడి, రాగి నాణేల్లో బంగారం కలిసే అవకాశం ఉండడంతో వాటిని టీటీడీ అప్రైజర్లతో మరోసారి తనిఖీ చేయించనుంది. ఆ తర్వాత రెండు దశలుగా వాటిని అమ్మనుంది. మొదటి దశలో 40 టన్నులు, రెండో దశలో 45 టన్నుల చొప్పున నాణేలను తరలించనున్నారు. 1947కు ముందున్న నాణేలను మాత్రం తన వద్దే ఉంచుకోవాలని టీటీడీ నిర్ణయించింది.
