- ఆ వర్సిటీకి వీరనారి చాకలి ఐలమ్మ పేరుతో చట్ట సవరణ
- దీంతోపాటే యంగ్ ఇండియా స్పోర్ట్స్యూనివర్సిటీ బిల్లు
- అసెంబ్లీలో 2 బిల్లులను ప్రవేశపెట్టిన ప్రభుత్వం
హైదరాబాద్, వెలుగు: తెలంగాణ మహిళా యూనివర్సిటీ పేరును వీరనారి చాకలి ఐలమ్మ మహిళా విశ్వవిద్యాలయంగా మారుస్తూ ప్రభుత్వం అసెంబ్లీలో చట్ట సవరణ బిల్లును ప్రవేశపెట్టింది. వర్సిటీ చాన్స్లర్గా గవర్నర్ పేరుకు బదులు సీఎం పేరును చేర్చింది. ప్రస్తుతం విద్యాశాఖ పరిధిలో సీఎం చాన్స్ లర్గా ఉన్న వర్సిటీ ఇదొక్కటే కావడం విశేషం. ఈ బిల్లును మంత్రి దామోదర రాజనర్సింహ సోమవారం ప్రవేశపెట్టారు. కాగా, కోఠి ఉమెన్స్ కాలేజీని 2022– -23 విద్యాసంవత్సరం నుంచి అప్పటి బీఆర్ఎస్ సర్కార్ తెలంగాణ మహిళా వర్సిటీగా ప్రకటించింది. అయితే, కాంగ్రెస్ అధికారంలోకి వచ్చాక ఈ యూనివర్సిటీకి చాకలి ఐలమ్మ పేరును అక్టోబర్ లో ప్రతిపాదించింది. నగరంలో 40 ఎకరాల విస్తీర్ణంలో ఈ వర్సిటీ ఉంది. ఇందులో14 పీజీ, 28 యూజీ కోర్సులు అందుబాటులో ఉన్నాయని బిల్లులో సర్కారు పేర్కొన్నది.
స్పోర్ట్స్ వర్సిటీ బిల్లు ప్రవేశపెట్టిన మంత్రి శ్రీధర్బాబు
యంగ్ ఇండియా ఫిజికల్ ఎడ్యుకేషన్ అండ్ స్పోర్ట్స్ యూనివర్సిటీ బిల్లును మంత్రి శ్రీధర్ బాబు అసెంబ్లీలో ప్రవేశపెట్టారు. అథ్లెట్లకు వరల్డ్ క్లాస్ ప్రొఫెషనల్స్ ఆధ్వర్యంలో కోచింగ్ అందించేలా చూడాలన్నది ప్రభుత్వ లక్ష్యమని ఇందులో పేర్కొన్నారు. స్పోర్ట్స్ యూనివర్సిటీ ఇన్ఫ్రాస్ట్రక్చర్తోపాటు క్లాస్ రూమ్, ఆఫీస్ ఏర్పాటుకు రూ.185 కోట్లు అవసరమవుతాయని సర్కార్ అంచనా వేసినట్టు బిల్లులో వెల్లడించారు. మొదటి మూడేండ్లకు స్టాఫ్ జీతాలకు మరో రూ.45 కోట్లు అవసరమని తెలిపారు. ఒక్కో ఫస్ట్ ఇయర్ విద్యార్థిపై రూ.5,74,420 ఖర్చు చేయనున్నట్టు ప్రకటించారు. సెకండ్, థర్డ్ ఇయర్ కు చెందిన ఒక్కో విద్యార్థిపై రూ.3,29,230 ఖర్చు చేయనున్నట్టు పేర్కొన్నారు. కాగా ఈ వ్యయాన్ని ఫీజు రూపంలో, ప్రైవేట్, స్టేట్ ఫండింగ్ ద్వారా కొంతమేర సమకూర్చుకోవాలని భావిస్తున్నట్టు బిల్లులో వెల్లడించారు.
