బషీర్ బాగ్ - వెలుగు : ట్రేడ్ మార్కెటింగ్ లో ఇన్వెస్ట్ చేయాలని హైదరాబాద్ కు చెందిన మహిళను సైబర్ చీటర్స్ మోసగించారు. మొదట నమ్మకం కలిగించేందుకు కొంత మేర లాభాలు ఇచ్చి , ఆపై పెద్ద మొత్తంలో డబ్బులను కాజేశారు. హైదరాబాద్ సైబర్ క్రైమ్ ఏసీపీ శివ మారుతి తెలిపిన ప్రకారం... ఇన్వెస్ట్ మెంట్ స్కీమ్ అంటూ సైబర్ చీటర్స్ మహిళకు వాట్సాప్ లో మెసేజ్ పంపించారు. మొదట సోషల్ మీడియా టాస్క్ లు ఇచ్చారు. దానికి మొదట్లో 120, 300 రూ చెల్లించారు. దీనితో బాధితురాలికి నమ్మకం కలిగింది.
అనంతరం ఆమె వాట్సాప్ కు ఓ లింక్ ను పంపించి అకౌంట్ ను క్రియేట్ చేశారు. అందులో మొదట రూ 1,000 ఇన్వెస్ట్ చేయడంతో వెంటనే రూ 1,300 చెల్లించారు. అలా చిన్న మొత్తంలో ఇన్వెస్ట్ చేయిస్తూ... భారీగా ఇన్వెస్ట్ చేస్తే అధిక లాభాలు వస్తాయని ఆశ చూపారు. దీనితో మహిళ రూ. 4,49,740 ఇన్వెస్ట్ చేసింది. అనంతరం స్కామర్లు ఆమెకు డబ్బులు పంపించకుండా , ఇంకా ఇన్వెస్ట్ చేయాలని అప్పుడే లాభాలతో పాటు చెల్లిస్తామని బుకాయించారు. తాను మోసపోయానని గ్రహించిన మహిళ సైబర్ క్రైమ్ పోలీసులకు ఫిర్యాదు చేసింది. బాధితురాలి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఏసీపీ తెలిపారు.
