నిమ్జ్​కు రెండో  విడతలో భూములివ్వం : రైతులు

• కలెక్టర్​ క్రాంతి వల్లూరితో ఎల్గొయి గ్రామస్తులు 

రాయికోడ్ / ​ఝరాసంగం,  వెలుగు :  నిమ్జ్​ కు  రెండో విడతలో తాము భూములు ఇస్తే ఊరిని వదిలి ఎక్కడికో వెళ్లాల్సి వస్తోందని సంగారెడ్డి జిల్లా ఝరాసంగం మండలం ఎల్గొయి, చీలపల్లి గ్రామాల రైతులు జిల్లా కలెక్టర్ క్రాంతి వల్లూరితో మొరపెట్టుకున్నారు.  నిమ్జ్​ ప్రాజెక్టులో ఏర్పాటు చేసే వెమ్​ టెక్నాలజీ కంపెనీ ఎండీ, హుండాయ్​ కంపెనీ ప్రతినిధులతో  కలిసి నిమ్ఙ్​ ప్రాజెక్టును గురువారం  కలెక్టర్​ క్రాంతి వల్లూరి  సందర్శించారు. ఇప్పటికే ఎల్గొయి గ్రామానికి సంబంధించి మొదటి విడతలో  2వేలు ఎకరాల భూమి నిమ్జ్​లో పోయిందని, ఇక రెండో విడత  భూ సేకరణ చేస్తే  తాము ఆగమవుతామని ఆవేదన వ్యక్తం చేశారు.

అలాగే నిమ్జ్​లో భూములు కోల్పోయిన రైతులకు ఇళ్ల స్థలాలు కేటాయించాలని చీలపల్లి గ్రామస్తులు కలెక్టర్​ కు విన్నవించారు. నిమ్జ్​కు వెళ్లే రోడ్లకు మరమ్మతులు చేయాలని  సంబంధిత అధికారులను ఆదేశించారు. అంతకు ముందు న్యాల్​కల్​ మండలం డప్పూర్​ , మల్గి, వడ్డి  శివారులో ఏర్పాటు చేయనున్న ఫార్మాసిటీ కోసం భూ సేకరణ ను  ఆమె పరిశీలించారు. ఆలయాలకు కేటాయించిన  భూములను పరిశ్రమకు తీసుకోవద్దని కలెక్టర్​కు ఆయా గ్రామాల మాజీ ప్రజాప్రతినిధులు విన్నవించారు.

అనంతరం మునిపల్లి మండలం లింగంపల్లి గురుకుల పాఠశాలను ఆ కస్మికంగా తనిఖీ చేసి పరిశుభ్రంగా లేకపోవడంపై  ఆగ్రహం వ్యక్తం చేశారు. అంతకు ముందు తరగతి గదులను పరిశీలించారు. కలెక్టర్​ వెంట ఆర్డీఓ రాజు, నిమ్జ్​ స్పెషల్​ ఆఫీసర్​ రవీందర్​ రెడ్డి, ఇండ్రస్ర్టిస్​ చీప్​ మేనేజర్​ రతన్​ రాథోడ్​,  ఆయా మండలాల తహసీల్దార్లు, అధికారులు తదితరులు ఉన్నారు.