దీని రేటుతో లగ్జరీ కారే కొనేయొచ్చు

యాపిల్​ మ్యాక్‌‌‌‌‌‌‌‌‌‌‌‌‌‌‌‌ ప్రో ధర 37 లక్షలు

యాపిల్​ అంటేనే బ్రాండ్లకు పెద్దన్న. అట్లాంటి బ్రాండ్​ రేటు కూడా అంతే ఉంటుంది. కానీ, ఇప్పుడు కంపెనీ తీసుకొచ్చిన కొత్త కంప్యూటర్​ రేటే కళ్లు బైర్లుగమ్మేలా ఉంది. అవును, మరి దానికి పెట్టే రేటుతో ఆడి స్టార్టింగ్​ రేంజ్​ కారును లేదంటే టెస్లా మోడల్​ 3 కారును ఈజీగా కొనేయొచ్చు మరి. జూన్​లోనే తన సరికొత్త మ్యాక్​ప్రోను పరిచయం చేసిన యాపిల్​, తాజాగా దాన్ని అమ్మేందుకు రెడీ అయిపోయింది. దాని రేటే 52 వేల డాలర్లు. అంటే దాదాపు 36 లక్షల 84 వేల రూపాయలు. అయితే, అది హై ఎండ్​ ధర మాత్రమే. దాని స్టార్టింగ్​ రేంజ్​ కూడా 5,999 డాలర్లు. అంటే 4 లక్షల రూపాయలు. మామూలు ఫీచర్లలో 6కే డిస్​ప్లేతో వస్తుంది ఈ మ్యాక్​ ప్రో. హై ఎండ్​ మ్యాక్​ ప్రోలో కేవలం మానిటర్​ ధరే 6 వేల డాలర్లు (రూ.4 లక్షలు). దానికి ప్రో డిస్​ప్లే ఎక్స్​డీఆర్​ కావాలంటే మాత్రం మరో 5 వేల డాలర్లు (రూ.3.54 లక్షలు) ఎక్కువ పెట్టాల్సిందే. కంప్యూటర్​ను పెట్టే స్టాండ్​ రేటు కూడా మామూలుగా లేదు. దాని విలువ 999 డాలర్లు (దాదాపు రూ.71 వేలు). స్టార్టింగ్​ రేంజ్​లో 32 జీబీ ర్యామ్​తో వస్తుంది యాపిల్​ మ్యాక్​ ప్రో. కానీ, 1.5 టెర్రాబైట్స్​ కావాలంటే అదనంగా 25 వేల డాలర్లు (సుమారు రూ.17.72 లక్షలు) చెల్లించాలి. చెప్పాలంటే దీనితోనే కంప్యూటర్​ ధర ఎక్కువైపోయింది. 256 జీబీ స్టోరేజీతో వచ్చే కంప్యూటర్​ను 4 టీబీకి మార్చుకోవాలంటే మరో 1400 డాలర్లు (దాదాపు రూ.లక్ష) వరకు పెట్టాలి. కంప్యూటర్​ను ఒక చోటు నుంచి ఇంకో చోటుకు తీసుకెళ్లడానికి వీల్స్​ కూడా ఇస్తోంది కంపెనీ. దానికో 400 డాలర్లు. అంటే రూ.28 వేలు. ఇలా ఒక్కొక్కటి అన్ని కలిపి యాపిల్​ మ్యాక్​ ప్రో ధర రూ.36.84 లక్షల వరకు పోయిందన్నమాట. ఇంకో విషయమేంటంటే, దాని స్క్రీన్​ను కంపెనీ ఇచ్చే క్లాత్​తోనే తుడవాలట. కంపెనీనే ఈ విషయాన్ని స్వయంగా చెప్పింది. కంప్యూటర్​ డిస్​ప్లేని స్పెషల్​ కోటింగ్​తో చేశారట. దాని వల్ల ఇమేజ్​ క్వాలిటీ పెరుగుతుందట. కాబట్టి మామూలు క్లాత్​తో తుడిస్తే ఆ కోట్​ పోయి, మానిటర్​ పాడయ్యే అవకాశముందట. అందుకే కంప్యూటర్​తో పాటే వచ్చే క్లాత్​తోనే తుడవాలని కంపెనీ సూచించింది. అది పోతే మళ్లీ క్లాత్​ను ఆర్డరిచ్చి కొనుక్కోవాలని చెబుతోంది.