న్యూఢిల్లీ: వచ్చే అసెంబ్లీ ఎన్నికల్లో గెలిచేందుకు బీజేపీ కుట్రలు పన్నుతోందని ఆమ్ ఆద్మీ పార్టీ కన్వీనర్, ఢిల్లీ మాజీ సీఎం అరవింద్ కేజ్రీవాల్ మండిపడ్డారు. ఆపరేషన్ లోటస్ పేరుతో ఓటర్ల జాబితాను ఆ పార్టీ తారుమారు చేస్తోందని ఆరోపించారు. ఒక్క న్యూఢిల్లీలోనే 5 వేల మంది ఓటర్లను తొలగించి, కొత్తగా 7,500 మందిని చేర్చిందని చెప్పారు.
వచ్చే ఏడాదిలో జరగబోయే ఢిల్లీ అసెంబ్లీ ఎన్నికల ఫలితాలను ప్రభావితం చేసేందుకు డిసెంబర్ 15 నుంచే బీజేపీ ఈ ఆపరేషన్కు పాల్పడుతోందని ఆయన ఆదివారం ఆరోపించారు. ‘‘బీజేపీ తన ఓటమిని ఇప్పటికే అంగీకరించింది. వాళ్లు చెప్పుకోనీకి చేసిందేమీ లేదు. సీఎం క్యాండిడేట్ లేరు. అభ్యర్థులు లేరు. జనాల్లోకి వెళ్లి ఓట్లడిగే పరిస్థితి లేదు.
ఎన్నికల్లో ఎలాగైనా గెలవాలని ఓటర్ లిస్ట్ను తారుమారు చేయడం వంటి కుట్రలు పన్నుతున్నరు. న్యూఢిల్లీ అసెంబ్లీ సెగ్మెంట్లోనే 15 రోజుల్లో 5 వేల మంది ఓటర్లను తొలగించారు. నకిలీ పేర్లను ఓటర్ లిస్ట్లోకి ఎక్కించేందుకు పనిచేస్తున్నరు”అని కేజ్రీవాల్ అన్నారు.
షహదారా సెగ్మెంట్లో 12 వేల మంది ఓటర్ల పేర్లను తొలగించేందుకు ప్రయత్నించారని.. అయితే, కేంద్ర ఎలక్షన్ కమిషన్ జోక్యంతో ఆపేశారని గుర్తుచేశారు. రాష్ట్ర ఎన్నికల సంఘం చెప్పినదాని ప్రకారం న్యూఢిల్లీ సెగ్మెంట్లో కొత్తగా లక్ష మంది ఓటర్లు చేరారని, అందులో 12% అవకతవకలు జరిగాయని కేజ్రీవాల్ తెలిపారు. ఏకంగా ఆప్ ఎంపీ సంజయ్ సింగ్ భార్య ఓటును తొలగించేందుకు బీజేపీ ప్రయత్నించిందన్నారు.
