కేజ్రీవాల్ తన పీఏను తొలగించాలి: బీజేపీ

•     లేదా ఆయనే సీఎం పదవికి రాజీనామా చేయాలి: బీజేపీ

న్యూఢిల్లీ: రాజ్యసభ ఎంపీ స్వాతి మలివాల్‌తో అనుచితంగా ప్రవర్తించిన ఢిల్లీ సీఎం అర్వింద్​ కేజ్రీవాల్​పీఏను వెంటనే తొలగించాలని బీజేపీ డిమాండ్​చేసింది. లేదా కేజ్రీవాల్​తన సీఎం పదవికి రాజీనామా చేయాలని కోరింది. సోమవారం ఢిల్లీ సీఎం అధికారిక​నివాసంలో ఆయన పీఏ బిభవ్ కుమార్‌ తనతో అనుచితంగా ప్రవర్తించారని, ఆ తర్వాత దాడి చేశాడని స్వాతి మలివాల్‌  ఆరోపించిన విషయం తెలిసిందే. ఈ అంశంపై ఆమె సివిల్ లైన్స్ పోలీసులకు కూడా సమాచారం ఇచ్చారు. అయితే, అధికారికంగా మాత్రం ఫిర్యాదు చేయలేదు. ఈ ఘటనపై బీజేపీ జాతీయ అధికార ప్రతినిధి షాజియా ఇల్మీ బుధవారం మీడియాతో మాట్లాడారు. 

ఈ అంశంపై కాంగ్రెస్ నేతలు సోనియా గాంధీ, ప్రియాంక గాంధీ వాద్రా, పార్టీ అధ్యక్షుడు మల్లికార్జున్ ఖర్గేతో పాటు టీఎంసీ చీఫ్​ మమతా బెనర్జీ మౌనంగా ఉండడం సరికాదని అన్నారు. "సీఎం కేజ్రీవాల్ నివాసంలో మలివాల్​ను కొట్టినట్టు స్పష్టంగా ఉంది. నాకు ఆమ్ ఆద్మీ పార్టీలో అందరి గురించి బాగా తెలుసు. కేజ్రీవాల్ ఆదేశించకుండా అతని పీఏ ఎలా చేస్తారు? ఇది నిజంగా చాలా తీవ్రమైన అంశం. కేజ్రీవాల్ ఈ విషయంపై స్పందించాలని" అని ఆమె డిమాండ్​ చేశారు. అలాగే, ఈ ఘటనపై విచారణ జరిపించాలని డిమాండ్ చేస్తూ బీజేపీ నాయకులు, కార్యకర్తలు, మహిళా మోర్చా కార్యకర్తలు బుధవారం ఢిల్లీ ముఖ్యమంత్రి నివాసం దగ్గర నిరసనకు దిగారు. ఢిల్లీ బీజేపీ అధ్యక్షుడు వీరేంద్ర సచ్‌దేవా మాట్లాడుతూ.. ఈ ఘటనపై కేజ్రీవాల్ ఎందుకు మౌనం వహిస్తున్నారని ఆయన ప్రశ్నించారు. బాధ్యులపై చర్యలు తీసుకోవాలని ఆయన డిమాండ్ చేశారు.