దేశంలోని ప్రతి రాష్ట్రంలో వైన్ షాపుల కోసం వేలంపాట నిర్వహించడం సాధారణం. వైన్ షాపు కావాలనుకునే వాళ్లు తమకు తోచినంత వేలంపాడి దక్కించుకుంటారు. ఈ పద్దతిలోనే రాజస్థాన్లో కూడా లిక్కర్ షాపుల వేలంపాట ఆన్లైన్లో సోమవారం నిర్వహించారు. గతంలో ఇక్కడ ఆన్లైన్ వేలంపాటను మాజీ ముఖ్యమంత్రి వసుంధర రాజే రద్దు చేశారు. కానీ, మళ్లీ ఈ వ్యవస్థను ప్రస్తుత ముఖ్యమంత్రి అశోక్ గెహ్లోట్ పునరుద్దరించారు. దాంతో మళ్లీ రాష్ట్రంలో ఆన్లైన్ వేలంపాట అందుబాటులోకి వచ్చింది.
సోమవారం నిర్వహించిన ఆన్లైన్ వేలంపాటలో హనుమాన్గర్ జిల్లాలోని నోహార్లోని ఒక వైన్ షాపు ఊహించనంత ధరకు కోట్ అయింది. ఈ షాపు ప్రభుత్వ ధర రూ. 72 లక్షలు కాగా.. ఈ షాపును బిడ్డర్లు ఏకంగా రూ. 510 కోట్లకు దక్కించుకున్నారు. ఉదయం 11 గంటలకు ప్రారంభమైన ఈ వేలంపాట అర్దరాత్రి 2 గంటల వరకు కొనసాగింది. ఈ వైన్ షాపును ఒకే కుటుంబానికి చెందిన ఇద్దరు మహిళలు దక్కించుకోవడం విశేషం. ఈ లిక్కర్ షాపు ఇంత ధరకు కోట్ అవుతుందని ఊహించలేదని ఎక్సైజ్ శాఖ అధికారులు అంటున్నారు. ఈ షాపు ప్రారంభ ధర రూ. 72 లక్షలు కాగా.. దానికి 708 రెట్ల ధరకు కోట్ కావడం గమనార్హం.
