- 1/70 పరిధిలోని గ్రామాల విలీనంతో ఆగిన ఫైలు
- ఆయా గ్రామాలను మినహాయించి తిరిగి ప్రతిపాదనలు పంపేందుకు ఎమ్మెల్యే, ఆఫీసర్ల కసరత్తు
- అంతా అనుకున్నట్లు జరిగితే అతి త్వరలో కార్పొరేషన్ ప్రకటన
భద్రాద్రికొత్తగూడెం, వెలుగు: కొత్తగూడెం కార్పొరేషన్ ఏర్పాటుకు ఏజెన్సీ చిక్కులు వెంటాడుతున్నాయి. కొత్తగూడెం–పాల్వంచ మున్సిపాలిటీతో పాటు లక్ష్మీదేవిపల్లి, చుంచుపల్లి, సుజాతనగర్ మండలాలను కలుపుతూ కొత్తగా ఏర్పాటు చేయాలనుకున్న కార్పొరేషన్ ఏర్పాటు విషయమై ఇటీవల జరిగిన అసెంబ్లీ సమావేశాల్లో ప్రకటన వెలువడుతుందని ఎమ్మెల్యేతో పాటు ఆఫీసర్లు, ప్రజలు ఆశించారు. కానీ రాష్ట్రంలో కొత్త కార్పొరేషన్ల ఏర్పాటు చేసిన ప్రకటనలో కొత్తగూడెం లేకపోవడంతో ఖంగుతిన్నారు.
దీనికి కారణం కార్పొరేషన్లో విలీనం అయ్యే లక్ష్మీదేవిపల్లి, చుంచుపల్లి, సుజాతనగర్ మండలాల్లోని పలు గ్రామాలు1/70 పరిధిలో ఉండడమేనని తెలిసింది. ఏజెన్సీ గ్రామాలను కలుపుతూ కార్పొరేషన్ ఏర్పడితే పలువురు కోర్టులకు వెళ్లే అవకాశం ఉండడంతో ఆ ఫైల్ను ఉన్నతాధికారులు పెండింగ్లో పెట్టారు.
ఇప్పుడు విలీన గ్రామాలను పక్కన పెట్టి..
ఇప్పుడు ఏజెన్సీలోని విలీన గ్రామాలను పక్కన పెట్టి కొత్తగూడెం కార్పొరేషన్ ఏర్పాటుకు ఎమ్మెల్యేతో పాటు ఆఫీసర్లు కొత్తగా ప్రతిపాదనలు రూపొందిస్తున్నారు. ఇందులో భాగంగానే కొత్తగూడెం–పాల్వంచ మున్సిపాలిటీలతో పాటు నాన్ ఏజెన్సీగా ఉన్న సుజాతనగర్ ప్రాంతాన్ని కలుపుతూ కార్పొరేషన్ ఏర్పాటుకు ప్రభుత్వానికి ఎమ్మెల్యే ప్రపోజల్స్ పంపారు. మొదటి దశలో కార్పొరేషన్ ఏర్పాటు చేస్తూ ప్రకటన వెలువడిన తర్వాత రెండో దశలో విలీన గ్రామాల విషయమై ప్రతిపాదనలు రూపొందించే అవకాశాలున్నట్టుగా పలువురు పేర్కొంటున్నారు.
దీనిపై త్వరలో జరుగనున్న క్యాబినెట్ మీటింగ్లో చర్చించనున్నట్టు తెలిసింది. కాగా కార్పొరేషన్ ఏర్పాటులో నెలకొన్న అడ్డంకులను అధిగమించేలా అవసరమైన చర్యలు తీసుకోవాలని సీఎం రేవంత్ రెడ్డి దృష్టికి నాలుగు రోజుల కింద ఎమ్మెల్యే కూనంనేని సాంబశివరావు తీసుకెళ్లారు. ఈ క్రమంలో ఎవరికీ ఇబ్బందులు లేకుండా కార్పొరేషన్ ఏర్పాటు చేసేందుకు కృషి చేస్తున్నామని ఎమ్మెల్యే తెలిపారు.
