ఆదిలాబాద్టౌన్/బాసర, వెలుగు: ర్యాగింగ్ చట్టరీత్యా నేరమని ఎవరైనా పాల్పడితే కఠిన చర్యలు తప్పవని ఆదిలాబాద్ ఎస్పీ గౌస్ ఆలం హెచ్చరించారు. గురువారం జిల్లా పోలీస్ కార్యాలయంలో మీడియాతో మాట్లాడారు. విద్యార్థులు ర్యాగింగ్కు పాల్పడకుండా కాలేజీల యాజమాన్యాలు, లెక్చరర్లు చూసుకోవాలన్నారు. కాలేజీలు, స్కూళ్లలో యాంటీ ర్యాగింగ్ కమిటీలు ఏర్పాటు చేయాలని సూచించారు.
ర్యాగింగ్కు దూరంగా ఉండాలి
విద్యార్థులు ర్యాగింగ్కు దూరంగా ఉండి క్రమశిక్షణతో కూడిన విద్యనభ్యసించాలని భైంసా ఏఎస్పీ అవినాశ్ కుమార్అన్నారు. ‘నిర్మల్ పోలీసు-- మీ పోలీసు’ కార్యక్రమంలో భాగంగా గురువారం బాసర ట్రిపుల్ఐటీలో ర్యాగింగ్, మాదక ద్రవ్యాల నిర్మూలనపై అవగాహన సదస్సు ఏర్పాటు చేశారు. ఈ సందర్భంగా ఏఎస్పీ మాట్లాడుతూ.. ర్యాగింగ్ చట్టవిరుద్దమన్నారు. ర్యాగింగ్కు పాల్పడితే కేసుల పాలై భవిష్యత్లో ప్రభుత్వ ఉద్యోగాలు పొందలేరని హెచ్చరించారు.
తోటి విద్యార్థులతో స్నేహాపూర్వకంగా మెలగాలన్నారు. చెడు వ్యసనాలకు దూరంగా ఉండి లక్ష్యాలను సాధించి జీవితంలో ఉన్నతంగా ఎదగాలన్నారు. ఎవరైన ర్యాగింగ్కు పాల్పడితే 100కు కాల్ చేసి సమాచారం ఇవ్వాలన్నారు. అనంతరం విద్యార్థులతో ప్రతిజ్ఞ చేయించారు. ఈ కార్యక్రమంలో సీఐ మల్లేశ్, ఎస్సైలు గణేశ్, సాయికిరణ్ తదితరులు పాల్గొన్నారు.
