హైదరాబాద్: అప్పు ఇచ్చిన రూ.500 అడిగినందుకు ఓ వ్యక్తి దారుణ హత్యకు గురి అయ్యాడు. ఈ విషాద ఘటన రాజేంద్రనగర్ పోలీస్ స్టేషన్ పరిధిలో చోటు చేసుకుంది. పోలీసుల వివరాల ప్రకారం.. రాజేంద్రనగర్ పోలీస్ స్టేషన్ పరిధిలోని బుద్వేల్లో శ్రీనివాస్ అనే డైలీ లేబర్, గుత్తేదారు సాయి మధ్య రూ.500 విషయంలో వివాదం తలెత్తింది. ఆదివారం (డిసెంబర్ 29) రాత్రి మద్యం సేవిస్తోన్న సమయంలో తనకు ఇవ్వాల్సిన రూ.500 ఇవ్వాలని సాయిని అడిగాడు శ్రీనివాస్.
మద్యం మత్తులో ఉండటంతో ఈ విషయంలో ఇద్దరి మధ్య ఘర్షణ తలెత్తి ఒకరిపై ఒకరు దాడి చేసుకున్నారు. ఈ క్రమంలోనే తీవ్ర ఆగ్రహానికి లోనైన సాయి పక్కనే ఉన్న డ్రైనేజ్ మూత తీసుకొని శ్రీనివాస్ తలపై బలంగా కొట్టాడు. ఈ దాడిలో తీవ్రంగా గాయపడ్డ శ్రీనివాస్ను ఆసుపత్రికి తరలిస్తుండగా తీవ్ర రక్తస్రావమై మార్గమధ్యలోనే మృతి చెందాడు. ఈ ఘటనపై కేసు నమోదు చేసుకున్న పోలీసులు దర్యాప్తు చేపట్టారు.
