- 9 మందికి తీవ్ర గాయాలు
- విరిగిన గుర్రం కాళ్లు..తలకు గాయం
- మెదక్ జిల్లా కౌడిపల్లి సమీపంలో ఘటన
కౌడిపల్లి, వెలుగు : గుర్రం రాంగ్ రూట్లో అడ్డు రావడంతో తప్పించబోయిన ఓ కారు ఎదురుగా వస్తున్న మరో రెండు కార్లను ఢీకొనడంతో మూడు కార్లు నుజ్జునుజ్జయ్యాయి. ఈ ప్రమాదంలో ఐదుగురి కాళ్లు విరగ్గా, మరో నలుగురు తీవ్రంగా గాయపడ్డారు. ఈ ఘటన మెదక్-–హైదరాబాద్ నేషనల్ హైవే పై కౌడిపల్లి సమీపంలోని పెద్ద కానాల(కల్వర్టు) వద్ద ఆదివారం జరిగింది. హైదరాబాద్లోని చార్మినార్కు చెందిన కొంతమంది వ్యక్తులు కారులో కుటుంబసభ్యులతో కలిసి మెదక్లో విందుకు వెళ్లి వస్తున్నారు. అలాగే, సంగారెడ్డి జిల్లా మల్లేపల్లికి చెందిన మరో కుటుంబం కారులో ఏడుపాయల దుర్గమ్మ దర్శనానికి వెళ్లి తిరిగి వస్తోంది.
ఈ క్రమంలో మహబూబ్ నగర్ జిల్లా ఉట్కూర్కు చెందిన గొర్రెల కాపరి మల్లేశం మెదక్ నుంచి నర్సాపూర్ వైపు తన గుర్రాన్ని రాంగ్ రూట్లో ముందు వదిలేసి వెనకాల బైక్ పై వస్తున్నాడు. కౌడిపల్లి కల్వర్టు వద్దకు రాగానే నర్సాపూర్ నుంచి మెదక్ వైపు వెళ్తున్న కారు డ్రైవర్ సడన్గా ఎదురుగా వచ్చిన గుర్రాన్ని తప్పించబోయి గుర్రంతో పాటు వెనకాల ఉన్న బైకును, రెండు కార్లను ఢీ కొట్టాడు.
ఈ ప్రమాదంలో గుర్రం రెండు కాళ్లు విరిగి తలకు తీవ్ర గాయమైంది. గొర్రెల కాపరి మల్లేశం కాలు విరిగింది. చార్మినార్కు చెందిన హసీనా బేగం, అబ్దుల్ఆసిఫ్, ఇర్ఫాన్, షోయబ్ గాయపడ్డారు. వర్షం పడుతుండడంతో సంఘటన స్థలంలో కార్ల నుంచి గాయపడిన వారిని బయటకు తీయడానికి చాలా సమయం పట్టింది. గాయపడ్డ వారిని నర్సాపూర్ ప్రభుత్వ దవాఖానకు తరలించారు. ప్రమాద స్థలానికి కూతవేటు దూరంలోనే కౌడిపల్లి పీఎస్ ఉన్నా పోలీసులు చాలాసేపటి వరకు రాలేదు. దీంతో ప్రయాణికులే గాయపడ్డవారిని కార్లలో నుంచి బయటకు తీసి ప్రైవేటు వాహనాల్లో దవాఖానలకు తరలించారు. కార్లు రోడ్డుపై ఉండడంతో ట్రాఫిక్ నిలిచిపోయింది. పోలీసులు జేసీబీ సాయంతో తొలగించి క్లియర్చేశారు.
