- మధ్యప్రదేశ్ నుంచి డ్రగ్స్ తెస్తుండగా పట్టివేత
- ముగ్గురు అరెస్ట్.. ఫోన్లు స్వాధీనం
- మార్కెట్లో దీని విలువ రూ.1.25 కోట్లు : సీపీ సుధీర్ బాబు
ఎల్బీనగర్, వెలుగు: హైదరాబాద్ లో 53.50 కిలోల పప్పి స్ట్రా డ్రగ్స్ పట్టుబడింది. దీని విలువ సుమారు రూ.1.25 కోట్లు ఉంటుందని ఎల్బీనగర్ ఎస్వోటీ పోలీసులు తెలిపారు. డ్రగ్స్ సప్లై చేస్తున్న ముగ్గురిని అరెస్ట్ చేశామని, వారి వద్ద నుంచి మూడు సెల్ఫోన్లు స్వాధీనం చేసుకున్నామని చెప్పారు. ఈ కేసుకు సంబంధించిన వివరాలను ఎల్బీనగర్లోని రాచకొండ సీపీ ఆఫీస్లో సీపీ సుధీర్ బాబు వెల్లడించారు. రాజస్థాన్కు చెందిన మంగిలాల్ భీశాయ్.. హైదరాబాద్ మీర్పేట్ నాదర్గుల్లోని అశోక్రెడ్డి కాలనీలో నివాసం ఉంటున్నాడు.
స్టీల్ రేలింగ్ వర్క్ చేస్తూ మధ్యప్రదేశ్ నుంచి హైదరాబాద్కు డ్రగ్స్ సప్లై చేస్తుంటాడు. మధ్యప్రదేశ్కు చెందిన పింటు అలియాస్ మోహన్ సింగ్ వద్ద మంగిలాల్ భీశాయ్ పప్పి స్ట్రా డ్రగ్స్ కొనుగోలు చేశాడు. అశోక్ రెడ్డి కాలనీలోనే నివాసం ఉంటున్న రాజస్థాన్కు చెందిన మంగిలాల్ దాక, భీరారామ్తో ట్రైన్లో హైదరాబాద్కు డ్రగ్స్ తెప్పించాడు. ఈ ముగ్గురు కలిసి ఆదివారం అశోక్ రెడ్డి నగర్ నుంచి డ్రగ్స్ తరలించే ప్రయత్నం చేయగా.. పక్కా సమాచారంతో ఎల్బీనగర్ ఎస్వోటీ, మీర్ పేట్ పోలీసులు వాళ్లను అరెస్ట్ చేసి డ్రగ్స్, మూడు సెల్ఫోన్లు స్వాధీనం చేసుకున్నారు.
బీఎన్ రెడ్డి నగర్లో నివాసం ఉంటున్న రాజస్థాన్కు చెందిన శంకర్ లాల్, కరీంనగర్లో నివాసం ఉంటున్న శర్వాన్తో హైదరాబాద్లోని వివిధ ప్రాంతాల్లో డ్రగ్స్ విక్రయించేవాడు. ఈ పప్పి స్ట్రా డ్రగ్.. నీళ్లు, లెమన్ వాటర్ లేదంటే పాలలో కలిపి తీసుకుంటారు. మోతాదుకు మించి ఈ డ్రగ్స్ తీసుకుంటే కోమాలోకి వెళ్తారని సీపీ సుధీర్ బాబు తెలిపారు.
పరారీలో ఉన్న మోహన్ సింగ్, శంకర్లాల్, శర్వాన్ ను త్వరలోనే అరెస్ట్ చేస్తామన్నారు. న్యూ ఇయర్ వేడుకలను దృష్టిలో పెట్టుకుని డ్రగ్స్ సప్లై చేసేందుకు ప్రయత్నిస్తున్నట్లు వెల్లడించారు. సమావేశంలో ఎస్వోటీ డీసీపీ కె.మురళీధర్, అడిషనల్ డీసీపీ షాఖీర్ హుస్పేన్, ఇన్ స్పెక్టర్లు కీసర నాగరాజు, భాస్కర్ రెడ్డి, ప్రతాప్ రెడ్డి, సిబ్బంది పాల్గొన్నారు.
