కామారెడ్డి జిల్లాలో మిల్లింగ్కు సన్న వడ్లు రెడీ

కామారెడ్డి జిల్లాలో 95 వేల మెట్రిక్ టన్నుల సన్నవడ్ల కొనుగోలు
తొలి విడతలో 17,643 మెట్రిక్ టన్నుల మిల్లింగ్కు అనుమతి
46 మిల్లులకు కేటాయింపు
రెండు రోజుల్లో మిల్లింగ్ ప్రారంభం

కామారెడ్డి, వెలుగు: కామారెడ్డి జిల్లాలో ప్రభుత్వం కొనుగోలు చేసిన సన్నవడ్ల మిల్లింగ్కు అధికారులు అనుమతి ఇచ్చారు. కొనుగోలు చేసిన వడ్లను మిల్లులకు తరలించారు. తొలి విడత మిల్లింగ్కు ఆదేశాలిచ్చారు. రెండు రోజుల్లో జిల్లాలో మిల్లింగ్ ప్రారంభం కానుంది. గడువులోగా మిల్లింగ్అయిన బియ్యాన్ని మిల్లర్లు వెంటనే ప్రభుత్వానికి ఇవ్వాలి. వానాకాలం సీజన్కు సంబంధించి 4 .11 లక్షల మెట్రిక్ టన్నుల ధాన్యాన్ని ప్రభుత్వం కొనుగోలు చేసింది.

ఇందులో 95 వేల మెట్రిక్ టన్నులు సన్నవడ్లు ఉన్నాయి. కొనుగోళ్ల ప్రక్రియ చివరి దశకు చేరింది. సన్న వడ్లు కొనుగోలుకు ప్రభుత్వం ప్రత్యేకంగా కేంద్రాలను ఏర్పాటు చేసింది. ఈ కేంద్రాల్లో విక్రయించిన రైతులకు క్వింటాల్కు రూ.500 బోనస్ ప్రభుత్వం చెల్లించింది.

మిల్లింగ్కు ఏర్పాట్లు

ఇప్పటి వరకు 95వేల మెట్నిక్ టన్నుల సన్న వడ్లు వచ్చాయి. కొనుగోళ్లు చివరి దశలో ఉన్నందున ఇంకా కొంత వచ్చే అవకాశం ఉంది. సేకరించిన వడ్లను మిల్లింగ్ చేసేందుకు అధికారులు ఆదేశాలు ఇచ్చారు. జిల్లాలో 186 రైసు మిల్లులు ఉండగా, ఇందులో 46 పారాబాయిల్డ్ మిల్లులు, 146 రా రైస్ మిల్లులు ఉన్నాయి. గతంలో కేటాయించిన వడ్లకు సంబంధించి సీఎంఆర్పెండింగ్లో ఉండటంతో 30 మిల్లులను బ్లాక్లిస్టులో పెట్టారు. ఈ మిల్లలకు వడ్లను కేటాయించలేదు. కేవలం 156 మిల్లులకు మాత్రమే వడ్ల దిగుమతికి అనుమతి ఇచ్చారు. ఇందులో సన్న వడ్లు కోసం 46 మిల్లులు కేటాయించారు.

బ్యాంక్ గ్యారంటీ షరతు

ఈ సీజన్ నుంచి సీఎంఆర్ కోసం మిల్లులకు కేటాయించిన వడ్లకు ప్రభుత్వం బ్యాంక్ గ్యారంటీ షరతు విధించింది. రూ.100 బాండ్పేపర్పై అగ్రిమెంట్చేసుకొని, దిగుమతి చేసుకున్న తర్వాత బ్యాంక్ గ్యారంటీ ఇవ్వాలని కోరింది. కేటాయించిన వడ్లను గడువులోగా సీఎంఆర్ చేసి ఇవ్వాలి.

సీఎంఆర్ ఇవ్వకుండా మిల్లర్లు అక్రమాలకు పాల్పడితే బ్యాంక్ గ్యారంటీ నుంచి అధికారులు సొమ్ము రికవరీ చేస్తారు. ఇప్పటి వరకు 95 వేల మెట్రిక్ టన్నుల సన్న వడ్లు కొనుగోలు చేశారు. తొలివిడతలో 17,643 మెట్రిక్ టన్నుల వడ్లు మిల్లింగ్ చేయడానికి సివిల్ సప్లయ్ కమిషనర్ పర్మిషన్ఇచ్చారు. ఒకటి, రెండు రోజుల్లో మిల్లింగ్షూరు కానుంది. మిల్లింగ్ అయిన వెంటనే ప్రభుత్వ గోదాములను తరలించాలి. ఉన్నతాధికారుల ఆదేశాల మేరకు కేటాయించిన సన్న వడ్లను మిల్లింగ్ చేయించనున్నట్లు డీఎస్వో మల్లికార్జున్, డీఎం రాజేందర్ తెలిపారు.

లబ్ధిదారులకు పింపిణీ చేసేందుకు..

తెల్లరేషన్కార్డు లబ్ధిదారులకు సన్న బియ్యం పంపిణీ చేయనున్నట్లు ప్రభుత్వం గతంలో ప్రకటించింది. కొద్ది నెలల్లోనే ఇచ్చే అవకాశముంది. ఇప్పటికే స్కూల్స్లో మధ్యాహ్నభోజనం, హాస్టల్స్, అంగన్వాడీ సెంటర్లకు ప్రభుత్వం సన్న బియ్యం సప్లయ్ చేస్తోంది. కాగా, రేషన్ లబ్ధిదారులకు పంపిణీ చేసేందుకు ప్రభుత్వానికి సన్నబియ్యం తప్పనిసరి అవసరం .